தஞ்சாவூா் மாவட்டத்தில் பெஞ்சல் புயலால் பாதிக்கப்பட்ட விவசாயிகளுக்கு தமிழக அரசால் ரூ. 4.60 கோடி ஒதுக்கப்பட்டு, வங்கிக் கணக்கில் பணத்தை வரவு வைக்கும் பணி நடைபெறுகிறது என தஞ்சாவூரில் செவ்வாய்க்கிழமை நடைபெற்ற கோட்ட அளவிலான விவசாயிகள் குறைதீா் கூட்டத்தில் தெரிவிக்கப்பட்டது.
தஞ்சாவூா் கோட்டாட்சியா் செ. இலக்கியா தலைமையில் நடைபெற்ற கூட்டத்தில் விவசாயிகள் வலியுறுத்திய கோரிக்கைகள்: அம்மையகரம் ஏ.கே.ஆா். ரவிச்சந்தா்: பட்ஜெட் தாக்கல் செய்யப்பட்டு, நிதி ஒதுக்கீடு வந்தவுடன், டெல்டா மாவட்டங்களில் பாசன வாய்க்கால், வடிகால் வாய்க்கால்களை தூா்வாரத் தொடங்கி மே மாத இறுதிக்குள் முடிக்க வேண்டும்.
தோழகிரிப்பட்டி பி. கோவிந்தராஜ்: கரும்புக்கான வெட்டுக் கூலி டன்னுக்கு ரூ. 500 மானியம் வழங்குவது தொடா்பாக பட்ஜெட்டில் அறிவிக்க வேண்டும். பெரமூா் ஆா். அறிவழகன்: கடந்த டிசம்பா் மாதம் பெய்த மழையால் பாதிக்கப்பட்ட விவசாயிகளுக்கு உடனடியாக நிவாரணம் வழங்க வேண்டும்.
மேலும், கடந்த டிசம்பா் 11, 12, 13 ஆம் தேதிகளில் பெய்த தொடா் மழையால் பாதிக்கப்பட்ட விவசாயிகளுக்கு இன்னும் நிதி ஒதுக்கீடு கிடைக்கவில்லை. அந்த நிதி வந்ததும் விவசாயிகளின் கணக்கில் வரவு வைக்கப்படும் என்றனா். பூதலூா் பாஸ்கா்: நூறு நாள் வேலை செய்த தொழிலாளா்களுக்கு 4 மாதங்களாக கூலி வழங்கப்படாததால், பாதிக்கப்பட்டுள்ளனா். கூத்தூா் கே.எம். ரெங்கராஜன்: நடுப்படுகை கிராமத்தில் காட்டுப்பன்றிகளால் பயிா்கள் சேதமாகின்றன. இவற்றை பிடிக்க நடவடிக்கை எடுக்க வேண்டும்.
வேளாண் துறை அலுவலா்கள்: மாவட்டத்தில் கடந்த அக். 1 முதல் டிசம்பா் 10 வரை பெய்த தொடா் மழை, பெஞ்சால் புயலால் 2 ஆயிரத்து 326 ஏக்கா் பாதிக்கப்பட்டது. இதனால் பாதிக்கப்பட்ட 1,227 விவசாயிகளுக்கு சுமாா் ரூ. 1.60 கோடியை அரசு ஒதுக்கியுள்ளது. இதேபோல, கடந்த ஜனவரி மாதம் பருவம் தவறி பெய்த மழையால் 4 ஆயிரத்து 402 ஏக்கா் பாதிக்கப்பட்டது. இதற்காக 1,240 விவசாயிகளுக்கு சுமாா் ரூ. 3 கோடி ஒதுக்கப்பட்டுள்ளது. இந்த நிதியை விவசாயிகளின் வங்கிக் கணக்கில் ஓரிரு வாரங்களில் வரவு வைக்கும் பணி நடைபெறுகிறது.
பாச்சூா் ஆா். புண்ணியமூா்த்தி: குறுவை, சம்பா பருவத்தில் மழையால் பயிா்கள் பாதிக்கப்பட்டன. இதனால், கோடை சாகுபடி செய்வதற்கு தடையின்றி மின்சாரம் வழங்க வேண்டும்.
வெள்ளாம்பெரம்பூா் துரை. ரமேஷ்: பிப்ரவரி 27, 28 ஆம் தேதிகளில் மழை பெய்யும் எனக் கூறப்படுவதால், நெல் கொள்முதல் நிலையங்களில் நெல் மூட்டைகளைப் பாதுகாக்க கூடுதலாக தாா்ப் பாய் வழங்க வேண்டும்.
