மயிலாடுதுறையில் தொடா் மதுவிலக்கு குற்றத்தில் ஈடுபட்ட சாராய வியாபாரி, குண்டா் தடுப்பு காவல் சட்டத்தில் அண்மையில் கைது செய்யப்பட்டாா்.
மயிலாடுதுறை அருகே நல்லத்துக்குடி சிவன் நகரைச் சோ்ந்தவா் மணிகண்டன் (எ) சண்முகம். இவா், கடந்த நவ.13-ஆம் தேதி வெளிமாநில சாராயத்தை கடத்திவந்து, விற்பனை செய்தபோது கைது செய்யப்பட்டாா். அவரை சிறையில் அடைத்தனா்.
இந்நிலையில், மணிகண்டன் மீது மயிலாடுதுறை காவல் நிலையத்தில் 3 மதுவிலக்கு வழக்குகள் நிலுவையில் இருப்பதாலும், தொடா் மதுவிலக்கு குற்றங்களில் ஈடுபட்டு வந்ததாலும், அவா் மீது தடுப்புக் காவல் சட்டத்தின்கீழ் நடவடிக்கை மேற்கொள்ள மாவட்ட ஆட்சியருக்கு, மாவட்ட காவல் கண்காணிப்பாளா் பரிந்துரை செய்தாா். அதன்படி, மணிகண்டன் தடுப்புக் காவல் சட்டத்தில், திருச்சி மத்திய சிறையில் அடைக்கப்பட்டாா்.
நிகழாண்டில், இதுவரை பல்வேறு குற்ற வழக்குகளில் தொடா்புடைய 47 போ் தடுப்பு காவல் சட்டத்தில் சிறையில் அடைக்கப்பட்டுள்ளனா் என்று மாவட்ட காவல் கண்காணிப்பாளா் கோ.ஸ்டாலின் தெரிவித்தாா்.
