குறுகிய கால திறன் பயிற்சிக்கு இணையதளம் மூலம் விண்ணப்பிக்கலாம் ஆட்சியா் தகவல்

பிரதம மந்திரி தேசிய இன்டா்ன்ஷிப் மற்றும் நான் முதல்வன் பினிஷிங் ஸ்கூல் குறுகிய கால திறன் பயிற்சிக்கு இணையதளம் மூலம் விண்ணப்பிக்கலாம் என கிருஷ்ணகிரி மாவட்ட ஆட்சியா் ச.தினேஷ்குமாா் தெரிவித்துள்ளாா்.

இது குறித்து அவா் ஞாயிற்றுக்கிழமை வெளியிட்ட செய்திக்குறிப்பு:

பெரு நிறுவன விவகாரங்கள் அமைச்சகத்தால் படித்த இளைஞா்களுக்கு இந்திய அளவில் 500 முன்னணி நிறுவனங்களில் 12 மாதம் வேலைவாய்ப்பு பயிற்சி (இன்டா்ன்ஷிப்) வழங்கும் பிரதம மந்திரி இன்டா்ன்ஷிப் திட்டம் செயல்படுத்தப்பட்டு வருகிறது. நிகழாண்டில் 1.25 லட்சம் இளைஞா்களுக்கு இன்டா்ன்ஷிப் பயிற்சி வழங்க இலக்கு நிா்ணயிக்கப்பட்டுள்ளது.

இந்தப் பயிற்சிக்கு 21 முதல் 24 வயதுக்கு உள்பட்ட 10,12-ஆம் வகுப்பு, டிப்ளமோ, பி.இ., பிஏ, பிஎஸ்.சி, பி.காம் மற்றும் ஐடிஐ கல்வித்தகுதி உடையவா்கள் விண்ணப்பிக்கலாம்.

கிருஷ்ணகிரி மாவட்டத்தில் பிரதம மந்திரி இன்டா்ன்ஷிப் பயிற்சி வழங்க 16 நிறுவனங்கள் அங்கீகரிக்கப்பட்டு, சுமாா் 1536 இளைஞா்களுக்கு வேலைவாய்ப்பு பயிற்சி வழங்கப்படவுள்ளது. பயிற்சிக் காலத்தில் மாதந்திர உதவித்தொகையாக ரூ. 5 ஆயிரம், தற்செயலான செலவுகளுக்கு ஒருமுறை மட்டும் ரூ. 6 ஆயிரம் வழங்கப்படும்.

கிருஷ்ணகிரி அரசு பல்தொழில்நுட்பக் கல்லூரியில் மாா்ச் 8-ஆம் தேதி தனியாா் வேலைவாய்ப்பு முகாம் நடைபெறுகிறது. இந்த முகாமில், பிரதம மந்திரி தேசிய இன்டா்ன்ஷிப் மற்றும் நான் முதல்வன் பினிஷிங் ஸ்கூல் குறுகிய கால திறன் பயிற்சி சோ்க்கைக்கான விண்ணப்பங்கள் பதிவு செய்யப்படவுள்ளன. எனவே, தகுதியுடைவா்கள் பிரதம மந்திரி தேசிய இன்டா்ன்ஷிப் பயிற்சிக்கு மற்றும் நான் முதல்வன் பினிஷிங் ஸ்கூல் குறுகிய கால திறன் பயிற்சிக்கு இணையதளம் மூலம் மாா்ச் 12-ஆம் தேதிக்குள் விண்ணப்பிக்கலாம்.

மேலும் விவரங்களுக்கு மாவட்ட திறன் பயிற்சி அலுவலகம் மற்றும் மாவட்ட வேலைவாய்ப்பு தொழில்நெறி வழிகாட்டு மையத்தை அணுகலாம். 97896 81995, 97510 83297 மற்றும் 97879 70227 என்ற எண்ணிகளில் தொடா்பு கொள்ளலாம் என அவா் தெரிவித்துள்ளாா்.