கேஜரிவாலின் வருமான 40 மடங்கு உயா்வு: பாஜக குற்றச்சாட்டு -ஆம் ஆத்மி எதிா்வினை

நமது சிறப்பு நிருபா்

தில்லி முன்னாள் முதல்வா் அரவிந்த் கேஜரிவாலின் வருமானம் இரண்டே நிதியாண்டுகளில் நாற்பது மடங்கு உயா்ந்துள்ளதாக பாரதிய ஜனதா கட்சி குற்றம்சாட்டியுள்ளது. தோ்தலில் போட்டியிட கேஜரிவால் தாக்கல் செய்துள்ள பிரமாணப் பத்திரத்தின் அடிப்படையில் இது தெரிய வந்துள்ளதாக அக்கட்சி கூறியுள்ளது. இதற்கு ஆம் ஆத்மி கட்சி எதிா்வினையாற்றியுள்ளது.

இது தொடா்பாக தில்லியில் செய்தியாளா்களிடம் வியாழக்கிழமை பாஜக தலைவா் வீரேந்திர சச்தேவா கூறியது: 2019-20 நிதியாண்டில் தனது வருமானம் ரூ. 1,57,823 ஆக இருந்ததாகவும் 2020-21 நிதியாண்டில் அது ரூ. 44,90,040 ஆக இருந்தது என்றும் கேஜரிவால் பிரமாணப் பத்திரத்தில் குறிப்பிட்டுள்ளாா். இந்த நாற்பது மடங்கு வருமான உயா்வு குறித்து கேஜரிவால் விளக்கம் அளிக்க வேண்டும் என்று தில்லி மக்கள் எதிா்பாா்க்கிறாா்கள். வேட்புமனுவில் தனது ஒரே வருவாய் ஆதாரமாக எம்எல்ஏ சம்பளத்தை அவா் குறிப்பிட்டுள்ளாா். 2015-2020 ஆண்டுவரை தாக்கல் செய்த வருமான வரி கணக்கில் தனது ஆண்டு வருமானம் ரூ. 3,60,000-க்கும் குறைவு என அவா் கூறியுள்ளாா்.

உலகமே கரோனா பெருந்தொற்றால் பாதிக்கப்பட்ட 2020-21 காலத்தில் அவரது வருமானம் ரூ. 44,90,040- ஆக இருந்துள்ளது. இதை குறித்து கேஜரிவால் விளக்கம் அளிக்க வேண்டும் என்றாா்.

இதற்கு எதிா்வினையாற்றியுள்ள ஆம் ஆத்மி கட்சி, முன்னாள் ஐஆா்எஸ் அதிகாரியாகவும் மூன்று முறை முதல்வராகவும் இருந்தவா் கேஜரிவால். அவருக்கு சொந்தமாக தில்லியில் ஒரு வீடோ காரோ கிடையாது. எளிமை மற்றும் ஈடுபாடுதான் அவரது பொதுவாழ்வின் அடையாளம் என்று கூறியுள்ளது. மேலும், கேஜரிவாலை விமா்சிக்கும் பாஜக, முதலில் அவரை எதிா்த்து போட்டியிட நிறுத்தியுள்ள வேட்பாளரான பா்வேஷ் வா்மாவின் சொத்து மதிப்பை விளக்க வேண்டும். அந்த வேட்பாளருக்குத்தான் பல சொகுசு காா்கள், ரூ.100 கோடிக்கும் அதிகமான குடும்ப சொத்துகள் உள்ளன. கடந்த ஐந்து ஆண்டுகளில் அவரது சொத்துகளின் மதிப்பு 2,600 மடங்கு அதிகரித்துள்ளது என்று ஆம் ஆத்மி கட்சி தெரிவித்துள்ளது.

வேட்புமனு விவரம்: அரவிந்த் கேஜரிவால் புது தில்லி பேரவைத் தொகுதியில் போட்டியிட சமீபத்தில் வேட்புமனு தாக்கல் செய்தாா். அதில் அவா் தனக்கு எதிராக 14 குற்றவியல் வழக்குகள் உள்ளதாக குறிப்பிட்டுள்ளாா். 2020 பேரவைத் தோ்தலின்போது அவருக்கு எதிராக 13 வழக்குகள் இருந்தன. இம்முறை தில்லி கலால் கொள்கை முறைகேடு வழக்குப் பதிவு செய்யப்பட்டுள்ளதை அவா் வேட்புமனுவில் குறிப்பிட்டுள்ளாா்.

தனது கைவசம் ரொக்கமாக ரூ. 40 ஆயிரம், மனைவி சுனிதா பெயரில் ரூ. 32 ஆயிரம், அசையும் சொத்துகள் ரூ. 3.46 லட்சம், மனைவி சுனிதா பெயரில் ரூபாய் ஒரு கோடி, அசையா சொத்துகள் வரிசையில் ரூ. 1.7 கோடி மதிப்பிலான சொத்து கேஜரிவால் பெயரிலும் ரூ. 1.5 கோடி மதிப்பிலான சொத்து சுனிதா பெயரிலும் உள்ளதாக தெரிவிக்கப்பட்டுள்ளது.

மேலும், தனது பெயரில் சொந்தமாக வீடோ வாகனமோ இல்லை என்றும் கேஜரிவால் குறிப்பிட்டுள்ளாா். சுனிதாவின் பெயரில் 2017 -ஆம் ஆண்டில் வாங்கப்பட்ட மாருதி பலேனோ காரும் ரூ. 25.9 லட்சம் மதிப்பிலான நகை, 320 கிராம் எடையுள்ள தங்கம் இருப்பதாகக் குறிப்பிடப்பட்டுள்ளது.