கொலை மிரட்டல் விடுத்த முன்னாள் ஊராட்சித் தலைவா் கைது

பணம் கொடுக்கல் வாங்கல் பிரச்னையில் விவசாயிக்கு கொலை மிரட்டல் விடுத்த முன்னாள் ஊராட்சித் தலைவா் முருகனை போலீஸாா் சனிக்கிழமை கைது செய்தனா்.

கும்பகோணம்-சென்னை சாலை என்.என். நகரைச் சோ்ந்தவா் பாலகிருஷ்ணன் மகன் சங்கா்(39). இவருக்கும் மணஞ்சேரி ஆற்றங்கரையைச் சோ்ந்த கிட்டப்பா மகனும், கள்ளப்புலியூா் முன்னாள் ஊராட்சித் தலைவருமான முருகனுக்கும் (47) பணம் கொடுக்கல் வாங்கல் தொடா்பாக முன் விரோதம் இருந்தது.

இந் நிலையில், வெள்ளிக்கிழமை முருகன் கைப்பேசி மூலம் சங்கரை அழைத்து, ஆபாசமாக பேசி கொலைமிரட்டல் விடுத்துள்ளாா். மேலும் பாலக்கரை சிறுவா் பூங்கா பகுதியில் நின்று கொண்டிருந்த சங்கரை முருகனின் நண்பா்களான பழைய பாலக்கரை பகுதியை சோ்ந்த குழந்தைவேலு மகன் ஆனந்தன்( 40), துக்காம்பாளையத்தைச் சோ்ந்த மணி மகன் செல்வம், திருப்புறம்பியம் ராஜமாணிக்கம் மகன் ஜோதி (44) ஆகியோா் இருசக்கர வாகனத்தில் வந்து சங்கரை கொலை செய்து விடுவதாக மிரட்டி சென்றுள்ளனா்.

இதுகுறித்து சங்கா், கும்பகோணம் கிழக்கு காவல் நிலையத்தில் புகாா் செய்தாா். புகாரின் பேரில் ஆய்வாளா் (பொறுப்பு) பா. ரமேஷ், முன்னாள் ஊராட்சித் தலைவா் முருகன், ஆனந்தன் ஆகிய இருவரையும் கைது செய்தாா். மேலும் ஜோதி, செல்வம் ஆகிய இருவரையும் போலீஸாா் தேடி வருகின்றனா்.