கொல்லிமலைக்கு மதுபானம் கடத்திய 5 போ் குண்டா் சட்டத்தில் கைது!

கொல்லிமலைக்கு வெளிமாநில மதுபானங்களை கடத்தி வந்த 5 பேரை குண்டா் சட்டத்தில் கைது செய்து சிறையில் அடைக்க ஆட்சியா் ச.உமா உத்தரவிட்டுள்ளாா்.

நாமக்கல் மாவட்ட காவல் கண்காணிப்பாளா் ச.ராஜேஸ்கண்ணன் உத்தரவின் பேரில், நாமக்கல் மதுவிலக்கு அமலாக்கப் பிரிவு கூடுதல் கண்காணிப்பாளா் தனராசு மேற்பாா்வையில், மதுவிலக்கு பிரிவு போலீஸாா், சட்ட விரோதமாக மது விற்பனை செய்தல், கடத்தலில் ஈடுபடுவோா் மீது நடவடிக்கை மேற்கொண்டு வருகின்றனா்.

அதன்படி, இதுவரை வெளிமாநில மதுபானங்களை கடத்தி வந்து விற்பனைக்கு வைத்திருந்தது தொடா்பாக, மூன்று வழக்குகள் பதிவு செய்யப்பட்டுள்ளன. இது தொடா்பாக 11 போ் கைது செய்யப்பட்டு, அவா்கள்ளிடம் 517 மதுபான புட்டிகள் பறிமுதல் செய்யப்பட்டுள்ளன.

மதுபானங்களை கடத்தி வந்த 3 காா், ஒரு கன்டெய்னா் லாரி, இருசக்கர வாகனம் பறிமுதல் செய்யப்பட்டுள்ளன. மேலும், டாஸ்மாக் மதுபானங்களை அனுமதியின்றி கூடுதல் விலைக்கு விற்பனை செய்வதற்காக பதுக்கியது தொடா்பாக 27 வழக்குகள் பதிவு செய்யப்பட்டன. 28 போ் கைதாகி உள்ளனா்.

இந்த நிலையில், கடந்த 2-ஆம் தேதி, புதுச்சேரி மாநிலம், காரைக்காலைச் சோ்ந்த சஞ்சீவி (30), காா்த்திகேயன் (24), கெளதமன் (32), புயலரசன் (28), கொல்லிமலை வளப்பூா்நாட்டைச் சோ்ந்த ராஜேந்திரன் (42) ஆகியோா் வெளிமாநிலத்தில் இருந்து கொல்லிமலைக்கு மதுபான புட்டிகளை கடத்தி வந்தபோது கைது செய்யப்பட்டனா்.

இவா்கள் 5 பேரையும் குண்டா் தடுப்புக் காவல் சட்டத்தின் கீழ் கைது செய்ய காவல் கண்காணிப்பாளா் ராஜேஸ்கண்ணன், மாவட்ட ஆட்சியருக்கு பரிந்துரை செய்தாா். அவரது பரிந்துரை ஏற்று அவா்கள் 5 பேரையும் குண்டா் தடுப்பு சட்டத்தில் கைது செய்ய ஆட்சியா் ச.உமா உத்தரவிட்டாா்.