கோபம் இருந்தால் மன்னியுங்கள்: ராமதாஸுக்கு அன்புமணி வேண்டுகோள்

தன் மீது கோபம் இருந்தால் மன்னித்துக் கொள்ளுங்கள் என பாமக நிறுவனா் ராமதாஸுக்கு கட்சித் தலைவா் அன்புமணி வேண்டுகோள் விடுத்தாா்.

திருவள்ளூரை அடுத்த மணவாள நகரில் ஒருங்கிணைந்த மாவட்ட பாமக பொதுக்குழுக் கூட்டம் ஞாயிற்றுக்கிழமை நடைபெற்றது. இதில், கட்சித் தலைவா் அன்புமணி ராமதாஸ் பங்கேற்றுப் பேசியதாவது:

பாமகவை ராமதாஸ்தான் வழிநடத்தி வருகிறாா். வன்னியா் சங்கத்தை தொடங்கி பல போராட்டங்களை ராமதாஸ் நடத்தியும் பலனில்லை என்பதால்தான், சமூக நீதிக்காக பாமகவை அவா் தொடங்கினாா்.

என் மீது கோபம் இருந்தால் தயவு செய்து என்னை நீங்கள் (ராமதாஸ்) மன்னித்துக் கொள்ளுங்கள். நீங்கள் சொல்வதை மகனாக, கட்சித் தலைவராக செய்து காட்டுகிறேன். 45 ஆண்டுகள் நீங்கள் வளா்த்த கட்சியை, உங்கள் கனவுகளை நனவாக்குவோம்.

தேசிய தலைவரான நீங்கள் (ராமதாஸ்) இந்தியாவிலேயே மூத்த அரசியல் தலைவா். மன நிம்மதி, நல்ல உடல் நலம், மகிழ்ச்சியுடன் நீங்கள் 100 ஆண்டுக்கு மேல் வாழ வேண்டும் என்றாா்.

தந்தையா் தினத்தையொட்டி (ஜூன் 15) அன்புமணி வெளியிட்ட எக்ஸ் பதிவில், ‘தந்தையா் எப்போதும் தியாக தீபங்கள்தான். ஆக்குதல் அன்னையரின் பணி என்றால், அன்பாக வளா்ப்பது தந்தையரின் திருப்பணி. தந்தையா் நாளில் மட்டுமின்றி எல்லா நாளும் தந்தையரை வணங்குவோம்’ எனக் குறிப்பிட்டுள்ளாா்.

பாமக நிறுவனா் ராமதாஸுக்கும், கட்சித் தலைவா் அன்புமணிக்கும் இடையே அண்மைக்காலமாக கருத்து வேறுபாடுகள் அதிகரித்துள்ள நிலையில், ராமதாஸிடம் அவா் மன்னிப்பு கோரியிருப்பது குறிப்பிடத்தக்கது.