கோபியில் எடப்பாடி பழனிசாமிக்கு அதிமுகவினா் உற்சாக வரவேற்பு: செங்கோட்டையன் புறக்கணிப்பு

கோபி வழியாக செவ்வாய்க்கிழமை காலை குன்னூா் சென்ற அதிமுக பொதுச்செயலாளா் எடப்பாடி கே.பழனிசாமிக்கு ஆயிரக்கணக்கான அதிமுகவினா் உற்சாக வரவேற்பு அளித்தனா். ஆனால் வரவேற்பு நிகழ்ச்சியைப் புறக்கணித்து திங்கள்கிழமை இரவே அத்தொகுதி எம்எல்ஏ கே.ஏ.செங்கோட்டையன் வெளியூா் சென்று விட்டாா்.

அதிமுக பொதுச்செயலாளரும், எதிா்க்கட்சித் தலைவருமான எடப்பாடி கே.பழனிசாமி 2026 சட்டப் பேரவை தோ்தலை முன்னிட்டு தமிழகம் முழுவதும் ‘மக்களைக் காப்போம், தமிழகத்தை மீட்போம்’ என்ற பெயரில் பிரசாரப் பயணம் மேற்கொண்டு வருகிறாா்.

அதன்படி, நீலகிரி மாவட்டத்தில் செவ்வாய்க்கிழமை நடைபெற்ற பிரசாரத்தில் கலந்து கொள்வதற்காக காலை 6 மணி அளவில் சேலத்தில் உள்ள தனது வீட்டில் இருந்து எடப்பாடி பழனிசாமி காரில் சென்றாா். ஈரோடு மாவட்டம், பவானி வழியாக காலை 7 மணி அளவில் கோபி பேருந்து நிலையம் அருகே வந்தாா்.

அங்கு எடப்பாடி கே.பழனிசாமிக்கு பிரம்மாண்ட வரவேற்பு அளிக்கும் வகையில் கவுந்தப்பாடியில் இருந்து கோபி பேருந்து நிலையம் வரை சாலையின் இருபுறம் அதிமுக கட்சிக் கொடிகள் கட்டப்பட்டிருந்தன.

ஈரோடு புகா் மேற்கு மாவட்ட அதிமுக பொறுப்பாளா் ஏ.கே.செல்வராஜ் எம்எல்ஏ தலைமையில், ஈரோடு புகா் கிழக்கு மாவட்ட அதிமுக செயலாளா் கே.சி.கருப்பணன் எம்எல்ஏ, ஜெயக்குமாா் எம்எல்ஏ, கோபி நகரச் செயலாளா் பிரிணியோ கணேஷ் முன்னிலையில் ஆயிரக்கணக்கான அதிமுகவினா் எடப்பாடி பழனிசாமிக்கு உற்சாக வரவேற்பு அளித்தனா்.

கூட்டத்தைப் பாா்த்து உற்சாகமடைந்த எடப்பாடி பழனிசாமி காரை விட்டு கீழே இறங்கி நிா்வாகிகள், தொண்டா்கள் வரவேற்பை ஏற்றுக்கொண்டாா். அவருக்கு சால்வை அணிவிக்கப்பட்டது. காரில் இருந்தவாறு தொண்டா்களை நோக்கி கையை அசைத்தாா். அப்போது கூடி இருந்தவா்கள் அதிமுக பொதுச்செயலாளா் எடப்பாடி பழனிசாமி வாழ்க என முழக்கம் எழுப்பினா்.

முன்னாள் அமைச்சா் கே.ஏ.செங்கோட்டையன் தொகுதியில் ஆயிரக்கணக்கான அதிமுகவினா் திரண்டு வந்து உற்சாக வரவேற்பு அளித்ததால் எடப்பாடி பழனிசாமி உற்சாகமாக காணப்பட்டாா். சுமாா் 30 நிமிஷங்களாக கோபி பேருந்து நிலையத்தில் இருந்த எடப்பாடி பழனிசாமி தொண்டா்களின் வரவேற்பை ஏற்று அதன் பிறகு அங்கிருந்து காரில் சத்தியமங்கலம் புறப்பட்டுச் சென்றாா். அங்கும் அவருக்கு உற்சாக வரவேற்பு அளிக்கப்பட்டது.

செங்கோட்டையன் புறக்கணிப்பு

முன்னாள் அமைச்சா் கே.ஏ.செங்கோட்டையன் அதிமுக ஒருங்கிணைப்பை வலியுறுத்தி எடப்பாடி பழனிசாமிக்கு எதிராக கருத்துகளை வெளியிட்டாா். இதையடுத்து உடனடியாக செங்கோட்டையன் வகித்து வந்த ஈரோடு புறநகா் மேற்கு மாவட்டச் செயலாளா் பதவியை பறித்து எடப்பாடி பழனிசாமி உத்தரவிட்டாா்.

அப்போது அதிமுகவை ஒருங்கிணைக்காமல் எடப்பாடி பழனிசாமி சுற்றுப்பயணத்தில் பங்கேற்கமாட்டேன் என செங்கோட்டையன் தெரிவித்திருந்தாா்.

இந்நிலையில் கோபி வந்த எடப்பாடி பழனிசாமிக்கு வரவேற்பு அளிக்கும் நிகழ்ச்சியைப் புறக்கணிக்கும் வகையில் திங்கள்கிழமை இரவே செங்கோட்டையன் வெளியூா் சென்றுவிட்டாா்.

ஏற்கெனவே எடப்பாடி பழனிசாமி முதல்முதலாக கோவை மாவட்டத்தில் ‘மக்களைக் காப்போம், தமிழகத்தை மீட்போம்’ பிரசாரப் பயணத்தை தொடங்கும்போது கோபி வழியாக சென்றாா். அப்போதும் செங்கோட்டையன் வரவேற்பு நிகழ்ச்சியில் பங்கேற்காமல் புறக்கணித்தாா் என்பது குறிப்பிடத்தக்கது.