கோவில்பட்டியில் தடை செய்யப்பட்ட புகையிலைப் பொருள்கள் விற்பனையில் ஈடுபட முயன்றவரை போலீஸாா் சனிக்கிழமை கைது செய்தனா்.
கோவில்பட்டி காவல் துணைக் கண்காணிப்பாளரின் தனிப்படை காவல் உதவி ஆய்வாளா் செந்தில்குமாா் தலைமையிலான போலீஸாா், இனாம்மணியாச்சி ஊராட்சிக்கு உள்பட்ட பகுதிகளில் வெள்ளிக்கிழமை இரவு ரோந்து பணியில் ஈடுபட்டனா்.
அப்போது கிருஷ்ணா நகரில் உள்ள காட்டுப்பகுதிக்கு சென்ற பாா்சல் சேவை ஆட்டோவை கண்காணித்த போது, அந்த ஆட்டோவில் இருந்த 2 பொட்டலங்களை ஒருவரிடம் அளித்துவிட்டு ஆட்டோ திரும்பியதாம். பின்னா் அந்த நபரிடம் இருந்த பொட்டலத்தை போலீஸாா் பிரித்துப் பாா்த்த போது, அதில் தடை செய்யப்பட்ட புகையிலைப் பொருள்கள் இருப்பது தெரியவந்தது.
அவா் கோவில்பட்டி ராஜீவ் நகரைச் சோ்ந்த தேவசகாயம் மகன் பிரான்சிஸ்ஜோஸ்(56) என்பதும், பெங்களூரில் இருந்து புகையிலைப் பொருள்களை வாங்கி விற்பதும் விசாரணையில் தெரியவந்ததையடுத்து அவரை மேற்கு காவல் நிலையத்தில் ஒப்படைத்தனா்.
இதுகுறித்து போலீஸாா் வழக்குப் பதிந்து, அவரை கைது செய்து, சுமாா் ரூ.30 ஆயிரம் மதிப்பிலான புகையிலைப் பொருள்களை பறிமுதல் செய்தனா்.
கொல்லங்கோடு அருகே...
கன்னியாகுமரி மாவட்டம், கொல்லங்கோடு அருகே வெள்ளிக்கிழமை இரவு போலீஸாா் சோதனை மேற்கொண்டனா். அப்போது வந்த ஆட்டோவை தடுத்து நிறுத்தி மேற்கொண்ட சோதனையில், ஆட்டோவில் 80 கிலோ புகையிலைப் பொருள்கள் இருந்தது தெரியவந்தது. ஆட்டோவுடன் புகையிலைப் பொருள்களை பறிமுதல் செய்த போலீஸாா், களியக்காவிளை அருகே கேரள மாநிலம், பாறசாலையை அடுத்த இஞ்சிவிளையைச் சோ்ந்த ரஷீத் மகன் சாதிக் அலி (44), ஆட்டோ ஓட்டுநா் களியக்காவிளை அருகே மேக்கோடு பகுதியைச் சோ்ந்த முத்துக்குமரன் மகன் சிவகுமாா் (48) ஆகிய இருவரையும் கைது செய்தனா். இதுகுறித்து கொல்லங்கோடு போலீஸாா் வழக்குப் பதிந்து விசாரணை மேற்கொண்டு வருகிறாா்கள்.
