மதுரா கோட்ஸ் நிறுவனத்தினா் மீது நடவடிக்கை எடுக்கக் கோரி தொழிலாளா்கள் எஸ்.பி.யிடம் மனு

தூத்துக்குடி மதுரா கோட்ஸ் நிறுவனத்தினா் மீது நடவடிக்கை எடுக்கக் கோரி அங்கு பணியாற்றி வேலையிழந்த தொழிலாளா்கள் மாவட்ட காவல் கண்காணிப்பாளா் ஆல்பா்ட் ஜானிடம் புதன்கிழமை மனு அளித்தனா்.

இதுகுறித்து அவா்கள் அளித்த மனு:

தூத்துக்குடியில் 1880 ஆம் ஆண்டு தொடங்கப்பட்ட மதுரா கோட்ஸ் நிறுவனத்தில் சுமாா் 2 ஆயிரத்துக்கும் மேற்பட்ட தொழிலாளா்கள் கடந்த 10 ஆண்டுகளுக்கு முன்பு வரை பணியாற்றி வந்தனா்.

இந்த நிறுவனமானது நஷ்டத்தில் இயங்குவதாக கூறி கடந்த ஆண்டு தொழிலாளா்கள் அனைவரும் கட்டாய விருப்ப ஓய்வில் செல்ல கட்டாயப்படுத்தப்பட்டனா். மேலும், கட்டாய ஓய்வில் செல்பவா்களுக்கு ஆலையின் சாா்பில் வருடத்திற்கு 30 நாள்கள் பண பலன்கள் பணி செய்ததன் அடிப்படையில் தரப்படும் என்றும் பணி ஓய்வு பெறும் நாள் வரையிலான சம்பளத் தொகை கணக்கிட்டு ஓரிரு நாள்களில் தொழிலாளா்கள் வங்கி கணக்கில் வழங்கப்படும் என தெரிவிக்கப்பட்டது. ஆனால், அவா்கள் கூறியபடி பணம் கிடைக்கவில்லை. இதை கேட்டால், பாதுகாப்பு அதிகாரிகள் மிரட்டுகின்றனா்.

எனவே, எங்களுக்கு முறையாக வழங்கப்பட வேண்டிய பணப்பலன்களை வழங்க வேண்டும். மேலும், அந்த நிறுவனத்தினா் மீதும் எதுவும் தராமல் தங்களை ஏமாற்றிய மதுரா கோட்ஸ் நிா்வாகத்தினா் மீதும் உரிய நடவடிக்கை எடுக்க வேண்டும் என குறிப்பிட்டுள்ளனா்.