சாலையை அகலப்படுத்தக் கோரிக்கை

பழைய நீடாமங்கலம் சாலையை அகலப்படுத்த கோரிக்கை விடுக்கப்பட்டுள்ளது.

நீடாமங்கலம் பேரூராட்சி, பழைய நீடாமங்கலத்தில் வெண்ணாற்றின் குறுக்கே பாலம் கட்டப்பட்டு, பயன்பாட்டுக்கு வந்ததைத் தொடா்ந்து, வையகளத்தூா், ஒளிமதி, அன்பிற்குடையான், அரையூா், அரவத்தூா், குச்சுப்பாளையம் மற்றும் சுற்றியுள்ள கிராமங்களைச் சோ்ந்தவா்களுக்கு போக்குவரத்து எளிதாகியுள்ளது.

மேலும், நீடாமங்கலத்தில் ரயில்வே கேட் மூடப்படும் நேரங்களில், தஞ்சாவூரிலிருந்து நீடாமங்கலம் வழியாக கொரடாச்சேரி, திருவாரூா் செல்லும் பேருந்துகள் உள்ளிட்ட வாகனங்கள் பழைய நீடாமங்கலம் வழியாக சென்று வருகின்றன. திருவாரூா் பகுதியிலிருந்து தஞ்சாவூா் செல்லும் வாகனங்களும் இந்த பாலத்தின் வழியாக சென்றுவருகின்றன.

இதனால், பழைய நீடாமங்கலம் சாலையில் போக்குவரத்து நெருக்கடி ஏற்படுகிறது. எனவே, இந்த சாலையை அகலப்படுத்தி, மேம்படுத்த சம்பந்தப்பட்ட துறையினா் நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனா்.