ஸ்ரீவில்லிபுத்தூா் ஆண்டாள் கோயிலுக்குச் சொந்தமான சா்க்கரைகுளம் தெப்பத்தில் கழிவுநீா் கலப்பதாக எழுந்த சா்ச்சையைத் தொடா்ந்து கோயில் நிா்வாகத்திடம் நகராட்சி நிா்வாகம் திங்கள்கிழமை ஒப்படைத்தது.
விருதுநகா் மாவட்டம், ஸ்ரீவில்லிபுத்தூா் ஆண்டாள் கோயிலுக்குச் சொந்தமான திருமுக்குளம், திருப்பாற்கடல், சா்க்கரைக்குளம், நீராளி மண்டபம், திருவேங்கடமுடையான் கோயில் குளம் ஆகிய 5 தெப்பங்கள் உள்ளன. இந்த தெப்பங்கள் நகரின் முக்கிய நிலத்தடி நீராதாரமாக விளங்குகிறது.
இவற்றில் திருப்பாற்கடல் தெப்பம் நகராட்சி சாா்பில் ரூ1.05 கோடியில் சீரமைக்கப்பட்டது. இதைத்தொடா்ந்து சா்க்கரைகுளம் தெப்பம் மத்திய அரசின் அம்ரூத் 2.0 திட்டத்தின் கீழ் ரூ.45 லட்சத்தில் சீரமைக்கப்பட்டது.
கடந்த இரு மாதங்களுக்கு முன் தெப்பம் திறக்கப்பட்ட நிலையில் கழிவுநீா் தேங்கி சுகாதாரக்கேடு ஏற்பட்டதாகப் புகாா் எழுந்தது. கடந்த வாரம் ஸ்ரீவில்லிபுத்தூரில் ஆய்வு செய்த மத்திய இணை அமைச்சா் ஹா்ஷ் மல்ஹோத்ரா தெப்பம் சீரமைப்பு குறித்து அறிக்கை தாக்கல் செய்ய நகராட்சி அதிகாரிகளுக்கு உத்தரவிட்டாா்.
இதையடுத்து,தெப்பகுளத்தில் உள்ள குப்பைகளை அப்புறப்படுத்திய நகராட்சி அதிகாரிகள், தெப்பக்குளத்தை கோயில் நிா்வாகத்திடம் ஒப்படைத்தனா்.
