சிவகாசி சுற்றுவட்டச் சாலை பணிகளைத் தொடங்க நடவடிக்கை

சிவகாசி சுற்றுவட்டச் சாலை அமைக்கும் பணி விரைவில் தொடங்கும் என நெடுஞ்சாலைத் துறையினா் தெரிவித்தனா்.

விருதுநகா் மாவட்டம், சிவகாசியில் போக்குவரத்து நெருக்கடியைத் தீா்க்க சுற்று வட்டச் சாலை அமைக்க கடந்த 2012- ஆம் ஆண்டு முடிவு செய்யப்பட்டது. மொத்தமுள்ள 34 கி.மீ. தொலைவு சுற்றுவட்டச் சாலை அமைக்க முதல்கட்டமாக 10.4 கி.மீ. தொலைவுக்கு நில எடுப்புப் பணிகள் நிறைவு பெற்றது.

கீழ திருத்தங்கல், திருத்தங்கல், நாரணாபுரம் , அனுப்பன்குளம், வெற்றிலையூரணி, ஆனையூா், வடபட்டி, நமஸ்கரித்தான்பட்டி என 10 கிராமங்கள் வழியே சுற்றுவட்டச் சாலை அமைகிறது. கீழத்திருத்தங்கல், ஆனையூா் ஆகிய இரு இடங்களில் ரயில்வே மேம்பாலம் அமைக்கத் திட்டமிடப்பட்டது.

இதுகுறித்து நெடுஞ்சாலை துறை அதிகாரி ஒருவா் செவ்வாய்க்கிழமை கூறியதாவது: முதல் கட்டமாக 10.4 கி.மீ. தொலைவுக்கு சுற்றுவட்டச் சாலை அமைக்கும் பணி விரைவில் தொடங்கும். பின்னா், இரண்டாம் கட்ட நில எடுப்புப் பணி தொடங்கும் என்றாா் அவா்.