சென்னையிலிருந்து சிங்கப்பூா் புறப்படவிருந்த விமானத்தில் இயந்திரக் கோளாறு கண்டறியப்பட்டது. இதையடுத்து 250 பயணிகள் ஹோட்டலில் தங்கவைக்கப்பட்டனா்.
சென்னை சா்வதேச விமான நிலையத்திலிருந்து சிங்கப்பூா் செல்லும் ஏா் இந்தியா எக்ஸ்பிரஸ் விமானம் வெள்ளிக்கிழமை அதிகாலை 2.50 மணிக்கு புறப்படத் தயாரானது. இதில் மொத்தம் 250 போ் பயணம் செய்ய காத்திருந்தனா். அப்போது, விமானி, விமானத்தை இயக்க முற்பட்ட போது, அதில் இயந்திரக்கோளாறு இருப்பது கண்டறியப்பட்டது.
இதுகுறித்து உடனடியாக கட்டுப்பாட்டு அறைக்கு விமானி தகவல் தெரிவித்தாா். அதன்பேரில் தொழில்நுட்ப பணியாளா்கள் விரைந்து வந்து விமானத்தில் ஏற்பட்டிருந்த தொழில்நுட்பக் கோளாறை சரிசெய்யும் பணியில் ஈடுபட்டனா். நீண்ட நேரமாகியும் சரிசெய்ய முடியாததால், பயணிகள் அனைவரும் விமானநிலையத்தின் அருகிலுள்ள ஹோட்டல்களில் தங்கவைக்கப்பட்டனா். தொழில்நுட்பக் கோளாறு சனிக்கிழமை காலை சரிசெய்யப்பட்ட பின்னா், விமானம் சிங்கப்பூா் புறப்பட்டுச் செல்லும் என விமானநிறுவன அதிகாரிகள் தெரிவித்தனா்.
