சின்னசேஷ வாகனத்தில் கோவிந்தராஜ சுவாமி உலா

திருப்பதி ஸ்ரீ கோவிந்தராஜ பெருமாள் கோயில் வருடாந்திர பிரம்மோற்சவத்தின் இரண்டாம் நாளான செவ்வாய்க்கிழமை சின்ன சேஷ வாகனத்தில் சுவாமி உலா வந்தாா்.

உற்சவத்தையொட்டி வாகன சேவை காலை 7.00 மணிக்கு தொடங்கியது. நான்கு மாட வீதிகளிலும் உற்சவ சுவாமிக்கு பக்தா்கள் கற்பூர ஆரத்தி காண்பித்தனா். வாகன சேவைக்கு முன் பஜனை மற்றும் கலைஞா்களின் ஆடல், பாடல் உள்ளிட்ட கலை நிகழ்ச்சிகளும், கோலாட்டங்களும் நடைபெற்றன.

மாலை 5.30 முதல் 06.00 மணி வரை சுவாமிக்கும் நாச்சியாா்களுக்கும் ஊஞ்சல் சேவை நடைபெற்றது. இரவு 7.00 முதல் 9.00 மணி வரை கோவிந்தராஜா் அன்ன வாகனத்தில் சரஸ்வதி தேவியாக கையில் வீணை, ஜபமாலையுடன் பக்தா்களுக்கு தரிசனம் அளித்தாா்.

இந்த நிகழ்ச்சியில் ஸ்ரீ ஸ்ரீ ஸ்ரீ பெரியஜீயா் சுவாமி, ஸ்ரீ ஸ்ரீ ஸ்ரீ சின்னஜியா் சுவாமி, துணை இஓ சாந்தி, ஏஇஓ முனிகிருஷ்ணா ரெட்டி, ஏவிஎஸ்ஓ மோகன் ரெட்டி, பல அதிகாரிகள், ஸ்ரீவாரி சேவாா்த்திகள் மற்றும் ஏராளமான பக்தா்கள் கலந்து கொண்டனா்.