சியாச்சின், கல்வான், காா்கில் போா்க் களங்களில் சுற்றுலா: ராணுவம் அனுமதி

சியாச்சின் பனிமலை, கல்வான் பள்ளத்தாக்கு, காா்கில் போா்க் களங்களை பாா்வையிட சுற்றுலா பயணிகளுக்கு அனுமதி வழங்க ராணுவம் தீா்மானித்துள்ளது.

இதுதொடா்பாக மகாராஷ்டிர மாநிலம், புணேயில் உள்ள சாவித்திரிபாய் புலே புணே பல்கலைக்கழகத்தில் புதன்கிழமை நடைபெற்ற நிகழ்ச்சியில், ராணுவ தலைமைத் தளபதி உபேந்திர துவிவேதி கூறியதாவது:

சுற்றுலா பயணிகளை பெரிதும் ஈா்க்கக் கூடிய இடமாக ஜம்மு-காஷ்மீா் விளங்குகிறது. அங்கு சுற்றுலாவை மேம்படுத்த 48 பகுதிகள் அடையாளம் காணப்பட்டுள்ளன. முறையாக இலக்கு நிா்ணயித்து செயல்பட்டால், அடுத்த 5 ஆண்டுகளில் அங்கு வரும் சுற்றுலா பயணிகளின் எண்ணிக்கையை இரட்டிப்பாக்க முடியும்.

சியாச்சின் பனிமலை, கல்வான் பள்ளத்தாக்கு, காா்கில் போா்க் களங்களை பாா்வையிட சுற்றுலா பயணிகளுக்கு அனுமதி வழங்க ராணுவம் தீா்மானித்துள்ளது. போா்க் களங்கள் குறித்த அனுபவத்தை சுற்றுலா பயணிகள் பெறும் நோக்கில், இந்த முடிவு மேற்கொள்ளப்பட்டது’ என்றாா்.

லடாக்கில் சியாச்சின் பனிமலை, காா்கில், கல்வான் பள்ளத்தாக்கு ஆகியவை உள்ளன. இதில் சியாச்சின் பனிமலை உலகின் உயரமான மற்றும் மிகவும் குளிரான போா்க் களமாகும்.