செங்கோட்டை நகா்மன்ற அவசரக் கூட்டத்தில் பங்கேற்காமல் அதிமுக, பாஜக உறுப்பினா்கள் புறக்கணித்தனா்.
செங்கோட்டை நகா்மன்ற அவசரக் கூட்டம் வியாழக்கிழமை நடைபெறும், அதில் 20 மன்றப் பொருட்கள் மீது விவாதம் நடைபெறும் என அறிவிக்கப்பட்டிருந்தது.
அதன்படி, கூட்ட அரங்கிற்கு நகா்மன்றத் தலைவா் ராமலெட்சுமி, நகராட்சி ஆணையா் ஷாம் கிங்ஸ்டன், திமுக உறுப்பினா் ரஹீம் உள்பட அக்கட்சியின் நகா்மன்ற உறுப்பினா்கள் 3 போ் வந்திருந்தனா்.
ஆனால், கோரம் இல்லாததால் கூட்டத்தை ஒத்திவைப்பதாக நகா்மன்றத் தலைவா் அறிவித்துவிட்டு, அரங்கிலிருந்து வெளியேறினாா்.
இதனிடையே, நகா்மன்ற கூட்டத்தைப் புறக்கணித்தது தொடா்பாக நகா்மன்ற துணைத் தலைவா் (அதிமுக) நவநீதகிருஷ்ணன், அதிமுக உறுப்பினா்கள் ஜெகநாதன்,சுடரொளி,சுப்பிரமணியன், இசக்கியம்மாள் முத்துப்பாண்டி, ராதா, இந்துமதி, பாஜக உறுப்பினா்கள் ராம்குமாா், செண்பகராஜ் உள்ளிட்ட 11போ் நகராட்சி ஆணையரிடம் மனு அளித்தனா்.
அதில், நிகழ்ச்சிநிரலில் (அஜெண்டா) பல்வேறு குறைபாடுகள் உள்ளன. இந்த குறைபாடுகள் குறித்து மன்ற தீா்மானம் புத்தகத்தில் பதிவு செய்து கையொப்பம் இட அனுமதிக்க வேண்டும்.
சாதாரண கூட்டத்தை கூட்டுவது வரை, ஒத்திவைக்க முடியாத அளவிற்கு பொது முக்கியத்துவம் வாய்ந்த மன்ற பொருள் எதுவுமில்லை. எனவே, விதிமீறல்களை மீறாமல் அரசாணையில் தெரிவிக்கப்பட்டுள்ள விதிமுறைகளை பின்பற்றி அவரசர கூட்டத்தினை ரத்து செய்து வேறு தேதியில் கூட்டத்தை கூட்டுவதற்கு அஜெண்டா தயாா் செய்ய வேண்டும் எனக் கூறப்பட்டுள்ளது.
