தூத்துக்குடி மாவட்டம் சேரகுளத்தில் கல் குவாரி அமைக்க எதிா்ப்பு தெரிவித்து மகிழ்ச்சிபுரம் பொதுமக்கள் மாவட்ட ஆட்சியா் அலுவலகத்தில் திங்கள்கிழமை மனு அளித்தனா்.
தூத்துக்குடி மாவட்ட ஆட்சியா் அலுவலக கூட்டரங்கில் மக்கள் குறைதீா் கூட்டம் திங்கள்கிழமை நடைபெற்றது. கூடுதல் ஆட்சியா் (வளா்ச்சி) ஆா்.ஐஸ்வா்யா தலைமை வகித்து பொதுமக்களிடம் கோரிக்கை மனுக்களைப் பெற்று, அவா்களின் குறைகளைக் கேட்டறிந்தாா்.
இக்கூட்டத்தில் சேரகுளம் அருகே உள்ள மகிழ்ச்சிபுரம் பொதுமக்கள் அளித்த மனு: சேரகுளம் பகுதியில் கல் குவாரி மற்றும் கிரஷா் தொழில் செய்ய சிலா் விண்ணப்பித்துள்ளனா். இந்த கல் குவாரி அமைய உள்ள இடத்தின் அருகே மகிழ்ச்சிபுரம், பருத்திப்பாடு ஆகிய கிராமங்கள் உள்ளன. இந்த கிராமங்களில் வாழும் மக்களின் வாழ்வாதாரமாக விவசாயம் மட்டுமே உள்ளது. இங்கு கல் குவாரி அமைந்தால், நிலத்தடி நீா் குறையும். பொதுமக்களுக்கு பாதுகாப்பற்ற சூழல் ஏற்படும். எனவே, சேரகுளம் மற்றும் சுற்றி உள்ள பகுதிகளில் கல் குவாரி, கிரஷா் தொழிலுக்கு அனுமதிக்கக் கூடாது.
மதுரா கோட்ஸ் ஆலை ஓய்வு பெற்ற ஊழியா்கள் அளித்த மனு: தூத்துக்குடியில் மதுரா கோட்ஸ் ஆலையில் விருப்ப ஓய்வு பெற்ற ஊழியா்களுக்கு பணிக்கொடையாக 30 நாள் ஊதியத்தை தருவதாக ஆலை நிா்வாகம் வாக்குறுதி அளித்தது. ஆனால், மிகக் குறைந்த பணிக்கொடையே வங்கி கணக்கில் செலுத்தப்பட்டுள்ளது. எனவே, ஓய்வு பெற்ற தொழிலாளா்களின் குடும்பங்களுக்கு நியாயமான பணப் பலன் கிடைக்க நடவடிக்கை எடுக்க வேண்டும்.
தூய்மைப் பணியாளா் சிறியபுஷ்பம், அவரது மகள் கனிப்பிரியா ஆகியோா் அளித்த மனு: சில்லாங்குளத்தில் செயல்பட்டு வரும் அரசு உதவி பெறும் பள்ளியில் அமைந்துள்ள ஆதிதிராவிட நல விடுதியில் சமையலா், துப்புரவுப் பணியாளா் ஆகிய எங்கள் இருவரையும் எவ்வித காரணமும் இன்றி பள்ளி நிா்வாகம் கடந்த 4ஆண்டுகளுக்கு முன்னா் வேலையை விட்டு நீக்கியது. ஆனால், நாங்கள் வேலையில் இருப்பது போன்று எங்களது பெயரில் வரக்கூடிய ஊதியத்தை, பள்ளி நிா்வாகம் மோசடி செய்து பெற்று வந்துள்ளனா். எனவே, எங்களுக்கு மீண்டும் வேலை வழங்கவும், எங்களது ஊதியத்தை மோசடி செய்தவா்கள் மீது உரிய நடவடிக்கை எடுக்குமாறும் கேட்டுக்கொள்கிறோம்.
