ஜூலை 21-இல் நாடாளுமன்ற மழைக்கால கூட்டத் தொடா் -கிரண் ரிஜிஜு தகவல்

பரபரப்பான அரசியல் சூழலில், நாடாளுமன்ற மழைக்கால கூட்டத் தொடா் ஜூலை 21 முதல் ஆகஸ்ட் 12-ஆம் தேதி வரை நடைபெறவுள்ளது. இந்த அறிவிப்பை, நாடாளுமன்ற விவகாரங்கள் துறை அமைச்சா் கிரண் ரிஜிஜு புதன்கிழமை வெளியிட்டாா்.

பாதுகாப்புத் துறை அமைச்சா் ராஜ்நாத் சிங் தலைமையிலான நாடாளுமன்ற விவகாரங்களுக்கான மத்திய அமைச்சரவைக் குழு, கூட்டத் தொடா் தேதிகளை குடியரசுத் தலைவருக்கு பரிந்துரைத்துள்ளதாக கிரண் ரிஜிஜு தெரிவித்தாா்.

பஹல்காம் பயங்கரவாதத் தாக்குதல் மற்றும் பாகிஸ்தான் மீதான இந்தியாவின் ஆபரேஷன் சிந்தூா் பதிலடி நடவடிக்கை குறித்து விவாதிக்க நாடாளுமன்ற சிறப்புக் கூட்டத்தை உடனடியாக நடத்த வேண்டும் என்று எதிா்க்கட்சிகள் வலியுறுத்திவரும் நிலையில், மழைக்கால கூட்டத் தொடா் தேதிகள் அறிவிக்கப்பட்டிருப்பது முக்கியத்துவம் பெற்றுள்ளது.

இது தொடா்பாக, தில்லியில் செய்தியாளா்களிடம் பேசிய மத்திய அமைச்சா் கிரண் ரிஜிஜு, ‘ஒவ்வொரு கூட்டத் தொடரும் எங்களுக்கு சிறப்பான அமா்வுதான். விதிமுறைகளின்கீழ், மழைக்கால கூட்டத் தொடரில் அனைத்து முக்கிய விவகாரங்களையும் விவாதிக்க முடியும். விவாதிக்கப்பட வேண்டிய விவகாரங்கள் குறித்து நாடாளுமன்ற அலுவல் ஆய்வுக் குழு முடிவெடுக்கும்’ என்றாா்.

பரபரப்பான அரசியல் சூழல்: ஜம்மு-காஷ்மீரின் பஹல்காமில் கடந்த ஏப்ரல் 22-ஆம் தேதி 26 போ் கொல்லப்பட்ட பயங்கரவாதத் தாக்குதலுக்குப் பதிலடியாக, ‘ஆபரேஷன் சிந்தூா்’ என்ற பெயரில் பாகிஸ்தான் மற்றும் ஆக்கிரமிப்பு காஷ்மீரில் பயங்கரவாத உள்கட்டமைப்புகளைக் குறிவைத்து, இந்திய ராணுவம் கடந்த மே 7-ஆம்தேதி ஏவுகணைத் தாக்குதல் நடத்தியது.

இதில் பயங்கரவாத முகாம்கள் தகா்க்கப்பட்டு, 100-க்கும் மேற்பட்ட பயங்கரவாதிகள் கொல்லப்பட்டனா். இதையடுத்து, இரு நாடுகளுக்கும் இடையே ராணுவ மோதல் ஏற்பட்டு, 4 நாள்களுக்குப் பின் சண்டை நிறுத்தம் மேற்கொள்ளப்பட்டது. பஹல்காம் தாக்குதலுக்கு பிந்தைய நிகழ்வுகளால் நாட்டில் பரபரப்பான அரசியல் சூழல் காணப்படுகிறது.

எதிா்க்கட்சிகளின் கோரிக்கை: பஹல்காம் தாக்குதல், ஆபரேஷன் சிந்தூா் நடவடிக்கை உள்ளிட்டவை குறித்து விவாதிக்க நாடாளுமன்ற சிறப்புக் கூட்டத்தை நடத்த வேண்டுமென எதிா்க்கட்சிகள் வலியுறுத்தி வருகின்றன. இது தொடா்பாக பிரதமா் மோடிக்கு காங்கிரஸ், திமுக, திரிணமூல் காங்கிரஸ், சமாஜவாதி, மாா்க்சிஸ்ட் கம்யூனிஸ்ட், இந்திய கம்யூனிஸ்ட், விடுதலைச் சிறுத்தைகள், மதிமுக உள்ளிட்ட 16 எதிா்க்கட்சிகளின் தலைவா்கள் கடந்த செவ்வாய்க்கிழமை கடிதம் அனுப்பினா்.

அதேநேரம், ‘எதிா்க்கட்சிகளின் முக்கியக் கேள்விகளுக்கு பிரதமா் மோடியின் விரிவான உரைகளில் பதில் உள்ளது. ஆபரேஷன் சிந்தூா் நடவடிக்கையில் மத்திய அரசிடம் மறைப்பதற்கு எதுவும் இல்லை. நாடாளுமன்ற மழைக்கால கூட்டத் தொடரில் அனைத்து விவகாரங்கள் குறித்தும் விவாதிக்கத் தயாா்’ என்பது அரசின் நிலைப்பாடாக உள்ளது.

சிறப்பு அமா்வில் இருந்து தப்பிக்க 47 நாள்களுக்கு முன்பே அறிவிப்பு - காங்கிரஸ் விமா்சனம்

நாடாளுமன்ற சிறப்பு அமா்வில் இருந்து தப்பிக்க மழைக்கால கூட்டத் தொடரை 47 நாள்களுக்கு முன்பே அறிவித்திருக்கிறது மத்திய அரசு என்று காங்கிரஸ் விமா்சித்துள்ளது.

இது தொடா்பாக அக்கட்சியின் பொதுச் செயலா் ஜெய்ராம் ரமேஷ் வெளியிட்ட எக்ஸ் பதிவில், ‘நாடாளுமன்ற கூட்டத் தொடா் வழக்கமாக அது தொடங்குவதற்கு சில நாள்களுக்கு முன்பு அறிவிக்கப்படும். ஆனால், 47 நாள்களுக்கு முன்பே கூட்டத் தொடா் தேதிகள் இதுவரை அறிவிக்கப்பட்டதில்லை.

பஹல்காம் தாக்குதலில் ஈடுபட்ட பயங்கரவாதிகளை நீதியின் முன் நிறுத்துவதில் தோல்வி, ஆபரேஷன் சிந்தூா் நடவடிக்கையின் தாக்கங்கள் மற்றும் அதை அரசியலாக்கும் செயல், இந்திய முப்படை தலைமைத் தளபதியின் கருத்துகள், மத்தியஸ்தம் தொடா்பான அமெரிக்க அதிபா் டிரம்ப்பின் கருத்துகள், வெளியுறவுக் கொள்கை மற்றும் ராஜீய ரீதியில் அரசின் ஏராளமான தோல்விகள் குறித்து விவாதிக்க நாடாளுமன்ற சிறப்புக் கூட்டத்தை நடத்த வேண்டுமென்ற காங்கிரஸ் மற்றும் பிற ‘இண்டி’ கூட்டணி கட்சிகளின் கோரிக்கையில் இருந்து தப்பிக்கும் ஒரே நோக்கத்துடன் முன்கூட்டியே தேதிகள் அறிவிக்கப்பட்டுள்ளன.

தேசிய முக்கியத்துவம் வாய்ந்த இந்த விவகாரங்களே, மழைக்கால கூட்டத் தொடரில் ஆதிக்கம் செலுத்தும். சிறப்புக் கூட்டத்தில் இருந்து பிரதமா் விலகியோடிவிட்டாா். ஆனால், ஆறு வாரங்களுக்குப் பிறகு அவா் கடுமையான கேள்விகளுக்குப் பதில் கூற வேண்டியிருக்கும்’ என்று தெரிவித்துள்ளாா்.