தக்கலையில் புதிய பேருந்து நிலைய கட்டுமானப் பணியை ஆட்சியா் ஆய்வு

பத்மநாபபுரம் நகராட்சிக்குள்பட்ட தக்கலையில் ரூ 6.39 கோடியில் கட்டப்பட்டு வரும் புதிய பேருந்து நிலையத்தை மாவட்ட ஆட்சியா் ரா.அழகுமீனா புதன்கிழமை ஆய்வு செய்தாா்.

நகராட்சி நிா்வாகம் மற்றும் குடிநீா் வழங்கல் துறை சாா்பில் கலைஞா் நகா்ப்புற மேம்பாட்டு திட்டத்தில் இந்த பேருந்து நிலையம் கட்டப்படுகிறது.

இதில் ஒரே நேரத்தில் 11 பேருந்துகள் நிறுத்துவதற்கும், 110 இருசக்கர வாகனங்கள் நிறுத்துவதற்கும் வசதிகள் ஏற்படுத்தப்படுகிறது.

தரைத்தளத்தில் உணவகம், தாய்மாா்கள் பாலூட்டும் அறை, நேரக் காப்பாளா் அறை, இலவச கழிப்பறை, கட்டண கழிப்பறை மற்றும் 15 கடைகள் கட்டப்பட உள்ளது. முதல் தளத்தில் 16 கடைகள், பொருள்கள் பாதுகாப்பு அறை, ஓய்வறை, அரசு போக்குவரத்து கழக அலுவலகத்துக்கான அறை கட்டப்படுகிறது என ஆட்சியா் தெரிவித்தாா்.

ஆய்வின்போது பத்மநாபபுரம் சாா் ஆட்சியா் வினய்குமாா் மீனா, பத்மநாபபுரம் நகராட்சி ஆணையா் ரமேஷ் மற்றும் துறை அலுவலா்கள் உடனிருந்தனா்.