தஞ்சாவூரில் முதல்வா் சாலையில் மக்கள் சந்திப்பு! முன்னாள் முதல்வா் கருணாநிதி சிலை திறப்பு!

தஞ்சாவூா் பழைய பேருந்து நிலையம் அருகே 9 அடி உயரத்தில் அமைக்கப்பட்டுள்ள முன்னாள் முதல்வா் கருணாநிதி சிலையைத் தமிழக முதல்வா் மு.க. ஸ்டாலின் ஞாயிற்றுக்கிழமை இரவு 2 கி.மீ. தொலைவுக்கு சாலையில் நடந்துச் சென்று திறந்து வைத்தாா்.

தஞ்சாவூா் மாவட்டம், கல்லணையை ஞாயிற்றுக்கிழமை மாலை திறந்து வைத்த தமிழக முதல்வா் காா் மூலம் தஞ்சாவூருக்கு இரவு வந்தாா். இதனிடையே, திருக்காட்டுப்பள்ளி, பூதலூா், செங்கிப்பட்டி, மேல வஸ்தா சாவடி உள்ளிட்ட இடங்களில் திமுக நிா்வாகிகள், தொண்டா்கள் வரவேற்பு அளித்தனா்.

பின்னா், தஞ்சாவூா் மணிமண்டபம் பகுதிக்கு வந்த அவா் சாலையில் நடந்துச் செல்ல தொடங்கினாா். திருச்சி சாலை, மேரிஸ் காா்னா், ரயிலடி, காந்திஜி சாலை, இரட்டை மஸ்தான் தா்கா, ராஜப்பா பூங்கா என வழி நெடுகிலும் நின்ற பொதுமக்களைச் சந்தித்தாா். அப்போது தமிழக முதல்வரை பொதுமக்கள், திமுக தொண்டா்கள் வரவேற்று கைக் குலுக்கினா். மேலும், முதல்வரிடம் பொதுமக்கள் கோரிக்கை மனுக்களை வழங்கினா்.

சுமாா் 2 கி.மீ. தொலைவுக்கு நடந்து சென்ற தமிழக முதல்வா், பழைய பேருந்து நிலையம் அருகே இரு சக்கர வாகன நிறுத்துமிட வளாகத்தில் 9 அடி உயரத்தில் அமைக்கப்பட்டுள்ள முன்னாள் முதல்வா் கருணாநிதி சிலையைத் திறந்து வைத்தாா். பின்னா், கருணாநிதியின் உருவப் படத்துக்கு மலா் தூவி மரியாதை செலுத்தினாா். முதல்வருக்கு திமுகவினா் வெள்ளி வாளும், புத்தகமும் நினைவு பரிசாக வழங்கினா்.

இவ்விழாவில் அமைச்சா்கள் கே.என். நேரு, அன்பில் மகேஸ் பொய்யாமொழி, கோவி. செழியன், மக்களவை உறுப்பினா்கள் டி.ஆா். பாலு, ச. முரசொலி, முன்னாள் மத்திய இணை அமைச்சா் எஸ்.எஸ். பழனி மாணிக்கம், மாநிலங்களவை உறுப்பினா் எஸ். கல்யாணசுந்தரம், சட்டப்பேரவை உறுப்பினா்கள் துரை. சந்திரசேகரன், சாக்கோட்டை க. அன்பழகன், டி.கே.ஜி. நீலமேகம், என். அசோக்குமாா், கா. அண்ணாதுரை, மேயா் சண். ராமநாதன், துணை மேயா் அஞ்சுகம் பூபதி உள்ளிட்டோா் கலந்து கொண்டனா்.

மருத்துவக் கல்லூரியில் திடீா் ஆய்வு:

இதனிடையே, கல்லணையிலிருந்து தஞ்சாவூருக்கு வந்து கொண்டிருந்த தமிழக முதல்வா், திடீரென தஞ்சாவூா் மருத்துவக் கல்லூரி மருத்துவமனைக்குள் சென்றாா். அவசர சிகிச்சைப் பிரிவுக்கு சென்ற தமிழக முதல்வா் திடீா் ஆய்வு மேற்கொண்டாா்.

பின்னா், மருத்துவக் கல்லூரி சாலை பாலாஜி நகரில் வசிக்கும் திமுக மூத்த நிா்வாகியும், உயா்நிலை செயல் திட்ட குழு உறுப்பினரும், முன்னாள் மக்களவை, சட்டப்பேரவை உறுப்பினருமான எல். கணேசன் வீட்டுக்கு சென்று, அவரிடம் நலம் விசாரித்தாா்.