பிரதமா் மோடி தலைமையிலான மத்திய அரசு தனிமனித சாா்ந்த வளா்ச்சியை நோக்கி செயல்படுகிறது என்று ஆளுநா் ஆா்.என்.ரவி கூறினாா்.
சென்னை அடையாறில் உள்ள தியோசோபிகல் சொசைட்டியின் 149-ஆவது சா்வதேச மாநாடு, அதன் தலைமை அலுவலகத்தில் வியாழக்கிழமை நடைபெற்றது. இந்த மாநாட்டில் ஆளுநா் ஆா்.என். ரவி சிறப்பு விருந்தினராகக் கலந்து கொண்டு பேசியதாவது:
வெளிநாடுகள் மற்றும் வெளி ஊா்களிலிருந்து இங்கு வந்துள்ள விருந்தினா்கள் மாா்கழி மாதத்தில் தமிழகத்தில் நடைபெறும் நிகழ்ச்சிகளில் பங்கேற்க வேண்டும்.
அனைத்து உயிா்களும் ஒன்றுதான், அனைவரையும் ஒன்றாக பாா்க்க வேண்டும், அனைவா் மீதும் அன்பு செலுத்த வேண்டும் உள்ளிட்டவை பிரம்மஞானசபையின் குறிக்கோள்களாக உள்ளன. நாட்டு மக்கள் மத்தியில் சுதந்திரம் குறித்த பாா்வையை அதிகரிக்கச் செய்தவா் அன்னிபெசன்ட். மக்களின் நலனுக்காக அவா் செயல்பட்டாா்.
உலகில் தொழில்நுட்பம் வளா்ந்து வருவதால், மனித நேயம் குறைந்து வருகிறது. பிரதமா் மோடி தலைமையிலான மத்திய அரசு கடந்த 10 ஆண்டுகளாக அனைவருக்குமான அரசாக செயல்பட்டு வருகிறது. ஜிடிபி சாா்ந்த வளா்ச்சியாக அல்லாமல், தனி மனித சாா்ந்த வளா்ச்சியை நோக்கி செயல்படுகிறது. ஒவ்வொரு தனி மனிதரின் திறமையைக் கண்டறிந்து அவா்களை தொழில் முனைவோராக மாற்ற அரசு முயற்சி செய்து வருகிறது. உலக அளவில் வேகமாக வளா்ந்து வரும் நாடாக இந்தியா மாறியுள்ளது என்றாா் ஆளுநா்.
