'தன்னைப் பெற்றதற்கான தண்டனை’ எனக்கூறி தாயைக் கொலை செய்த இளைஞர்!

கேரளத்தின் கோழிக்கோடு மாவட்டத்தில் ‘தன்னை பெற்றதற்கான தண்டனை’ எனக்கூறி 25 வயது இளைஞர் ஒருவர் தனது தாயை வெட்டிக் கொலைச் செய்துள்ளார்.

கேரள மாநிலம் அடிவாரம் பகுதியைச் சேர்ந்தவர் சுபைதா கயிக்கல் (வயது 53) கடந்த 23 ஆண்டுகளுக்கு முன்னர் கணவருடன் விவாகரத்து ஆன நிலையில், அவர் சமையல் வேலைகளை செய்து தனது தனது ஒரே மகனான ஆஷிக் (53) உடன் தனியாக வசித்து வந்துள்ளார். பள்ளிப் படிப்பு முடிந்து கல்லூரியில் சேர்ந்த ஆஷிக் அங்குதான் போதைக்கு அடிமையானதாகக் கூறப்படுகிறது.

இதனால், போதைப் பொருள் வாங்க அடிக்கடி பணம் கேட்டு அவர் வீட்டில் சுபைதாவுடன் தகராறு செய்வது, வீட்டிலுள்ள பொருள்களில் தீயை பற்றவைப்பது ஆகிய செயல்களில் ஈடுபட்டு வந்துள்ளார்.

பின்னர், போதை பொருள் பழக்கத்திலிருந்து தனது மகனை மீட்டுக் கொண்டுவர சுபைதா சுமார் ரூ.5 லட்சம் செலவு செய்து மறுவாழ்வு மையங்களில் சிகிச்சைக்கான ஆஷிக்கை அனுமதித்துள்ளார். அந்த சிகிச்சை முடிந்து கடந்த சில நாள்களுக்கு முன்னர்தான் அவர் வீடு திரும்பியதாக அவரது உறவினர்கள் கூறுகின்றனர்.

இந்நிலையில், தனது மூளையில் ஏற்பட்ட கட்டிக்கான அறுவை சிகிச்சை முடிந்து சுபைதா புதுப்பாடியிலுள்ள அவரது சகோதரியின் வீட்டில் தங்கி ஓய்வு பெற்று வந்துள்ளார். அப்போது, கடந்த ஜன.18 அன்று ஆஷிக் தனது தாயிடம் வாக்குவாதத்தில் ஈடுபட்டுள்ளார். அந்த வாக்குவாதம் முற்றியதில் அவர் பக்கத்து வீட்டிலிருந்து எடுத்துவந்த அறுவாளைக் கொண்டு சுபைதாவின் கழுத்தில் வெட்டியுள்ளார். இந்த தாக்குதலில் படுகாயமடைந்த சுபைதா பரிதாபமாக பலியானார்.

இதையும் படிக்க: ராகுல் மீதான அவதூறு வழக்கின் விசாரணைக்கு உச்சநீதிமன்றம் தடை!

இதனைத் தொடர்ந்து, சம்பவம் அறிந்து அங்கு வந்த காவல் துறையினர் ஆஷிக்கை கைது செய்ததுடன் சுபைதாவின் உடலைக் கைப்பற்றி உடற்கூராய்வு சோதனைக்காக கோழிக்கோடு மருத்துவக் கல்லூரி மருத்துவமனைக்கு அனுப்பி வைத்தனர். பின்னர், அவரது உடல் உறவினர்களிடன் ஒப்படைக்கப்பட்டு அடிவாரம் ஜும்மா மசூதியில் அடக்கம் செய்யப்பட்டது.

இந்த கொலைக்குறித்து காவல் துறையினர் நடத்திய விசாரணையில் ஆஷிக் பலரிடம் தனது தாயை தான் கொல்லப்போவதாகக் கூறி வந்தது கண்டுபிடிக்கப்பட்டுள்ளது. பின்னர், அவர் போலீஸாரிடம் தன்னைப் பெற்றதற்கான தண்டனையாக அவர் சுபைதாவை கொலைச் செய்ததாகக் கூறியுள்ளார். இந்த கொலையின் போது அவர் போதையில் இருந்தாரா என்பதை கண்டறிவதற்காக அவரது ரத்த மாதிரிகள் பரிசோதனைக்காக ஆயுவுக்கூடத்திற்கு அனுப்பப்பட்டுள்ளதாக காவல் துறையினர் தெரிவித்துள்ளனர்.

போதைக்கு அடிமையான மகன் தனது சொந்த தாயை கொலை செய்த சம்பவத்தை தொடர்ந்து அப்பகுதி இளைஞர்கள் போதைக்கு அடிமையாவதைத் தடுக்க காவல் துறையினரும் அரசு அதிகாரிகளும் உடனடியாக நடவடிக்கை எடுக்கவேண்டும் என வலியுறுத்தி அப்பகுதி மக்கள் போராட்டம் நடத்த திட்டமிட்டுள்ளதாகக் கூறப்படுகிறது.