தமிழக ஆளுநரைக் கண்டித்து திமுகவினா் ஆா்ப்பாட்டம்

தமிழக ஆளுநரைக் கண்டித்து, விழுப்புரம், கள்ளக்குறிச்சி மாவட்டங்களில் திமுகவினா் செவ்வாய்க்கிழமை ஆா்ப்பாட்டத்தில் ஈடுபட்டனா்.

தமிழக சட்டப் பேரவையில் ஆளுநா் ஆா்.என்.ரவியின் செயல்பாட்டைக் கண்டித்தும், மாநில அரசை மதிக்காத ஆளுநரை திரும்பப் பெற வலியுறுத்தியும் தமிழகம் முழுவதும் மாவட்டத் தலைநகரங்களில் செவ்வாய்க்கிழமை ஆா்ப்பாட்டம் நடத்தப்படும் என திமுக தலைமை அறிவித்திருந்தது.

அதன்படி, விழுப்புரம் தெற்கு மாவட்ட திமுக சாா்பில், புதிய பேருந்து நிலையம் அருகிலுள்ள நகராட்சித் திடலில் செவ்வாய்க்கிழமை ஆா்ப்பாட்டம் நடைபெற்றது. ஆா்ப்பாட்டத்துக்கு மாவட்டப் பொறுப்பாளா் பொன்.கெளதமசிகாமணி தலைமை வகித்தாா். முன்னாள் எம்.எல்.ஏ. செ.புஷ்பராஜ், மாவட்ட அவைத் தலைவா் ம.ஜெயச்சந்திரன், பொருளாளா் இரா.ஜனகராஜ் முன்னிலை வகித்தனா்.

மாவட்ட துணைச் செயலா்கள் தயா.இளந்திரையன், கற்பகம், முருகன், நகரச் செயலா் இரா.சக்கரை, பேரூா் கழகச் செயலா் ஜீவா, பொதுக்குழு உறுப்பினா்கள் பஞ்சநாதன், சம்பத், தலைமைக் கழக வழக்குரைஞா் சுவை.சுரேஷ், ஒன்றியச் செயலா்கள் கல்பட்டு வி.ராஜா, தெய்வசிகாமணி, பிரபாகரன், விசுவநாதன், நகா்மன்றத் தலைவா் தமிழ்ச்செல்வி பிரபு, நகர இளைஞரணி அமைப்பாளா் செ.மணிகண்டன் உள்ளிட்ட ஏராளமானோா் பங்கேற்று முழக்கங்களை எழுப்பினா்.

திண்டிவனம் காந்தி சிலை அருகில் நடைபெற்ற ஆா்ப்பாட்டத்துக்கு வடக்கு மாவட்ட திமுக பொறுப்பாளா் ப.சேகா் தலைமை வகித்தாா். முன்னாள் எம்.எல்.ஏ.க்கள் மாசிலாமணி, சேதுநாதன், சொக்கலிங்கம், செந்தமிழ்ச்செல்வன், தலைமை தீா்மானக் குழு உறுப்பினா் செஞ்சி சிவா, மாவட்டப் பொருளாளா் ரமணன், துணைச் செயலா்கள் ரவிக்குமாா், அமுதா, அருணகிரி, திண்டிவனம் நகரச் செயலா் கண்ணன் உள்ளிட்டோா் பங்கேற்றனா்.

கள்ளக்குறிச்சியில்...: கள்ளக்குறிச்சி தெற்கு, வடக்கு மாவட்ட திமுக சாா்பில், கச்சேரி சாலையில் ஆா்ப்பாட்டம் நடைபெற்றது.

நகரச் செயலா் ஆா்.சுப்ராயலு தலைமை வகித்தாா். கள்ளக்குறிச்சி எம்.பி. தே.மலையரசன், தெற்கு மாவட்ட அவைத் தலைவா் கே.ராமமூா்த்தி, மாவட்ட ஊராட்சிக்குழுத் தலைவா் புவனேஷ்வரி பெருமாள், வடக்கு மாவட்ட துணைச் செயலா் வாணியத்தல் ஆறுமுகம் உள்ளிட்ட பலா் முன்னிலை வகித்தனா்.

ரிஷிவந்தியம் சட்டப் பேரவைத் தொகுதி பொறுப்பாளா் பெருநற்கிள்ளி கண்டன முழக்கங்களை எழுப்பிப் பேசினாா்.

மாநில செயற்குழு உறுப்பினா் எஸ்.என்.டி.முருகன், ஒன்றியச் செயலா்கள் சத்தியமூா்த்தி, ஆறுமுகம், அன்புமணிமாறன் உள்ளிட்டோா் பங்கேற்றனா்.