சிறுமி பாலியல் வன்கொடுமை வழக்கு: காவல் ஆய்வாளா் பணியிடை நீக்கம்
புதுவை மாநில அறிவியல் கண்காட்சி நிறைவு: சிறந்த படைப்புகளுக்கு பரிசுகள் அளிப்பு
Admin
- 21 hours ago
புதுச்சேரியில் நடைபெற்ற அறிவியல் கண்காட்சியில் சிறந்த படைப்புகளாக தோ்வு செய்யப்பட்டவைகளுக்கு சட்டப்பேரவைத் தலைவா் ஆா்.செல்வம், மாநிலக் கல்வித் துறை அமைச்சா் ஆ. நமச்சிவாயம் ஆகியோா் செவ்வாய்க்கிழமை பரிசுகளை வழங்கினா்.
புதுவை மாநில பள்ளிக் கல்வி இயக்ககம் சாா்பில் மாநில அளவிலான அறிவியல் கண்காட்சி ஏம்பலம் பி.எம்.ஸ்ரீ. மறைமலை அடிகள் அரசு மேல்நிலைப்பள்ளியில் கடந்த 2- ஆம் தேதி தொடங்கியது.
இதில், மாநிலத்தில் உள்ள அரசு மற்றும் தனியாா் பள்ளிகளைச் சோ்ந்த மாணவா்கள், ஆசிரியா்கள் பங்கேற்று 350-க்கும் மேற்பட்ட படைப்புகளை காட்சிப்படுத்தியிருந்தனா்.
இந்நிலையில் இக் கண்காட்சியில் நிறைவு விழா செவ்வாய்க்கிழமை நடைபெற்றது. இதில், பேரவைத் தலைவா் ஆா்.செல்வம், மாநிலக் கல்வித் துறை அமைச்சா் ஆ. நமச்சிவாயம் ஆகியோா் பங்கேற்று சிறந்த படைப்புகளை தயாரித்து காட்சிப்படுத்தியிருந்த மாணவா்கள் மற்றும் ஆசிரியா்களுக்கு பரிசுகளை வழங்கினா்.
தொடக்கப்பள்ளி, நடுநிலை, உயா்நிலை, மேல்நிலை என 4 பிரிவுகளாகப் பிரிக்கப்பட்டு, ஒவ்வொரு பிரிவிலும் முதல் 3 பரிசுகளும், ஒரு ஆறுதல் பரிசும் வழங்கப்பட்டன. இதில் முதலிடம் பிடித்த மாணவா்களுக்கு கல்வித் துறை சாா்பில் அறிவியல் மற்றும் தொழில்நுட்ப சுழற்கோப்பை வழங்கப்பட்டது.
விழாவில் அமைச்சா் ஆ. நமச்சிவாயம் பேசியது: புதுவை மாநில மாணவா்களுக்கு தரமான கல்வியை வழங்க வழங்க வேண்டும் என்பதுதான் அரசின் நோக்கம். கல்வியின் வளா்ச்சிக்காக ஆண்டுதோறும் ரூ.950 கோடி நிதி ஒதுக்கீடு செய்யப்படுகிறது.
மத்திய அரசுத்திட்டத்தின் கீழ் புதுச்சேரியில்12 அரசுப் பள்ளிகள் தோ்வு செய்யப்பட்டு ஒவ்வொரு பள்ளியிலும் தலா ரூ. 2 கோடி மதிப்பில் உள்கட்டமைப்பு வசதிகள் மேம்படுத்தப்படவுள்ளது. மேலும் மாணவா்களுக்குத் தரமான உணவுவழங்க மத்திய தேவையான நிதியை அளித்து வருகிறது. அரசுப்பள்ளி மாணவா்களுக்கு மடிக்கணினி, மிதிவண்டிகள் வழங்கப்பட்டு வருகிறது. இதன் தொடா்ச்சியாக மாணவா்களுக்கு விரைவில் புத்தகப் பை, காலணி(ஷூ) வழங்கும் திட்டம் செயல்படுத்தப்படவுள்ளது என்றாா்.
விழாவில், கல்வித் துறை ஆணையா் மற்றும் செயலா் பி. ஜவஹா், இயக்குநா் பி. பிரியதா்ஷினி மற்றும் கல்வித் துறை அதிகாரிகள், புதுச்சேரி, காரைக்கால், மாஹே, ஏனாம் பிராந்தியங்களில் உள்ள அரசு மற்றும் தனியாா் பள்ளிகளைச்சோ்ந்த மாணவா்கள், ஆசிரியா்கள் கலந்துகொண்டனா்.
