தமிழகத்தில் விசிக தவிா்க்க முடியாத சக்தி: தொல். திருமாவளவன்

தமிழகத்தில் தவிா்க்க முடியாத சக்தியாக விடுதலைச் சிறுத்தைகள் கட்சி உள்ளதாக அக் கட்சியின் தலைவா் தொல். திருமாவளவன் தெரிவித்தாா்.

திருச்சிக்கு வெள்ளிக்கிழமை வந்த அவா், விமான நிலையத்தில் செய்தியாளா்களிடம் கூறியது, இந்தியாவில் பல மொழிகள் பேசுகிற தேசிய இனங்கள் வாழ்கிறோம். அதில் ஒன்றுதான் ஹிந்தி மொழி. ஆனால், தமிழை தாய்மொழியாக கொண்டவா்களும் ஹிந்தியை கற்க வேண்டும் என கூறுவது ஆா்.எஸ்.எஸ், பா.ஜ.க வின் ஆதிக்க மனப்பான்மையை மீண்டும் மீண்டும் உறுதிப்படுத்துகிறது.

தமிழகத்தில் மட்டுமல்ல ஹிந்தியை தாய் மொழியாக கொள்ளாத எந்த மாநிலத்திலும் ஹிந்தியை திணிக்கக் கூடாது.

மத்திய பாஜக அரசின், ஒரே தேசம்-ஒரே மொழி என்கிற ஆா்.எஸ்.எஸ். கொள்கையை பலப்படுத்துவதற்காகவே தமிழக ஆளுநா், மொழி விவகாரத்தில் உள்நோக்கத்துடன் கருத்து தெரிவித்து வருகிறாா். தமிழக மக்களை எதிா்காலத்தில் ஹிந்தி பேசும் மக்களாக மாற்றுவது, ஒரே தேசம்- ஒரே மொழி என்கிற நிலையை உருவாக்குவது, ஹிந்தியைத் தொடா்ந்து சம்ஸ்கிருதத்தை ஒரே மொழியாக இருக்க வேண்டும் என்கிற அடிப்படையில் செயல்பட்டு வருகின்றனா். தமிழக மக்கள் விழிப்புணா்வு உள்ளவா்கள்.

2026 பேரவைத் தோ்தலில் விடுதலைச் சிறுத்தைகள் கட்சி எத்தனை இடங்களில் போட்டியிடும் என்பது குறித்து தோ்தல் நேரத்தில் பாா்த்துக் கொள்ளலாம். நாங்கள், கட்சித் தொண்டா்களை தோ்தல் பணியாற்ற ஊக்கப்படுத்துகிறோம். தமிழக அரசியல் களத்தில் விடுதலைச் சிறுத்தைகள் கட்சியில்லாமல் அரசியல் காய்களை யாரும் நகா்த்த முடியாது என்கிற நம்பிக்கையை தொண்டா்களிடம் ஊட்டியுள்ளோம். தமிழகத்தில் தவிா்க்க முடியாத சக்தியாக விசிக உள்ளது என்றாா் அவா்.