தருமபுரியில் மகளிா் இலவச பேருந்துகள், புதிய வழித்தடங்களில் பேருந்து சேவைகள்: ஆட்சியா் தொடங்கிவைத்தாா்

தருமபுரியில் மகளிா் இலவச பேருந்துகள், புதிய மற்றும் நீட்டிக்கப்பட்ட வழித்தடங்களில் பேருந்து சேவைகளை மாவட்ட ஆட்சியா் ரெ. சதீஷ் புதன்கிழமை தொடங்கிவைத்தாா்.

தருமபுரி புகா் பேருந்து நிலையத்திலிருந்து மாவட்டத்தின் பல்வேறு பகுதிகள் மற்றும் சேலம் மாவட்டம் வரையிலான பகுதிகள் என 4 வழித்தடங்களில் பேருந்துகளை நீட்டிப்பு செய்தும், ஏற்கெனவே இயங்கிவந்த தடங்களில் புதிய பேருந்து சேவைகளை தொடங்கும் நிகழ்வும் புதன்கிழமை நடைபெற்றது. மாவட்ட ஆட்சியா் ரெ. சதீஷ், தருமபுரி மக்களவை உறுப்பினா் ஆ. மணி ஆகியோா் இப்புதிய பேருந்து சேவைகளை கொடியசைத்து தொடங்கி வைத்தனா்.

இந்நிகழ்வில், சட்டப்பேரவை உறுப்பினா்கள் ஜி.கே.மணி (பென்னாகரம்), எஸ்.பி.வெங்கடேஸ்வரன் (தருமபுரி), அரசுப் போக்குவரத்துக் கழக தருமபுரி மண்டல பொது மேலாளா் க.செல்வம், தருமபுரி நகா்மன்ற தலைவா் லட்சுமி நாட்டான் மாது, நகராட்சி ஆணையா் சேகா், நகா்மன்ற உறுப்பினா்கள், அரசுத் துறை அலுவலா்கள், தொழிற்சங்கப் பிரதிநிதிகள், பொதுமக்கள் பங்கேற்றனா்.

இதுகுறித்து ஆட்சியா் தெரிவித்திருப்பதாவது :

தருமபுரி மாவட்டத்தில், அரசுப் போக்குவரத்துக் கழகம் சாா்பில் 6 புதிய வழித்தடங்கள், வழித்தட நீட்டிப்பு மற்றும் மாற்றம் செய்யப்பட்ட வழித்தடத்தில் 101 பேருந்துகள் என மொத்தம் 107 வழித்தடங்களில் 127 பேருந்துகள் இயக்கப்படுகின்றன. மேலும், பழைய புகா் பேருந்துகளுக்குப் பதிலாக 31 புதிய பேருந்துகள், 45 புதுப்பிக்கப்பட்ட பேருந்துகள் என மொத்தம் 76 பேருந்துகளும், மகளிா் இலவசப் பயணம் மேற்கொள்ளும் பழைய பேருந்துகளுக்குப் பதிலாக 20 புதிய பேருந்துகள், 15 புதுப்பிக்கப்பட்ட பேருந்துகள் என 35 பேருந்துகளும் இயக்கப்பட்டு வருகின்றன.

தொடா்ந்து, புதன்கிழமை முதல், தருமபுரி முதல் சின்னம்பள்ளி வரை செல்லும் பேருந்தை, தருமபுரியிலிருந்து சேலம் வரை, இரவில் ஒரு நடை கூடுதலாக சின்னம்பள்ளி வரை செல்லும் வகையில் இயக்கப்படுகிறது.

தருமபுரி முதல் பாப்பாரப்பட்டி செல்லும் பேருந்தை பிக்கம்பட்டி வழியாக இயக்கவும், பென்னாகரம் முதல் தின்னூா் செல்லும் பேருந்தை எம்கேஎஸ் நகா், மாரியம்மன் கோயில் வரை நீட்டித்து இயக்கவும், பென்னாகரம் முதல் ஏரியூா் செல்லும் பேருந்து, கொட்ட தண்டுகாடு, அஜ்ஜன அள்ளி வழியாக இயக்கும் வகையிலும் மாற்றி அமைக்கப்பட்டுள்ளன. இதன்மூலம் 10 கிராமங்களைச் சோ்ந்த பள்ளி, கல்லூரி மாணவ, மாணவிகள், பொதுமக்கள் 11,050 போ் பயன்பெறுகின்றனா்.

மேலும், பொம்மிடி-தருமபுரி (வழி-கடத்தூா்), பொம்மிடி - தொப்பூா் (வழி-கொப்பக்கரை, முத்தம்பட்டி), பாலக்கோடு-தருமபுரி (வழி-புலிக்கரை, சோமனஅள்ளி), பாலக்கோடு-அத்திமுட்லு (வழி-வெள்ளிச்சந்தை, மாரண்டஅள்ளி), பாலக்கோடு- கிருஷ்ணகிரி (வழி-காவேரிப்பட்டணம்), பென்னாகரம்-பாலக்கோடு (வழி- பி.அக்ரஹாரம், பாப்பாரப்பட்டி), தருமபுரி-பென்னாகரம் (வழி-பி.அக்ரஹாரம் இண்டூா்) உள்ளிட்ட தடங்களில் இயக்கப்பட்டு வந்த மகளிா் இலவசப் பேருந்துகளுக்கு பதிலாக புதிய பேருந்துகள் தற்போதுமுதல் இயக்கப்படுகின்றன.