தினமணி செய்தி எதிரொலி: கோயில் திருவிழாவில் இரும்பு ஆயுத விற்பனை கடைகள் அகற்றம்

மன்னாா்குடி ராஜகோபால சுவாமி கோயில் திருவிழாவில் இரும்பு ஆயுதங்கள் விற்பனை கடைகளை காவல் துறையினா் சனிக்கிழமை அகற்றினா்.

இக்கோயிலில் பங்குனி திருவிழா நடைபெற்று வருகிறது. விழாவையொட்டி கோயில் நுழைவுப் பகுதியில் ஏலவிடப்பட்ட தற்காலிக கடைகள் அமைக்கப்பட்டுள்ளது. இதேபோல, கோயிலுக்கு வெளியே சாலையில் ஏராளமான தற்காலிக கடைகள் அமைக்கப்பட்டுள்ளன. கோயில் கருடஸ்தம்பம் அருகே வடமாநிலத் தொழிலாளா்கள் குடும்பத்துடன் இரும்பால் ஆன கத்தி, அரிவாள், கோடாரி, அரிவாள்மனை உள்ளிட்ட ஆயுதங்களை எந்த விதமான பாதுகாப்பும் இல்லாமல் ஆபத்தை உணராமல் விற்பனை செய்து வருவது அனைவருக்கும் பெரும் அச்சத்தை ஏற்படுத்தியது.

இதுகுறித்து காவல் துறையும், கோயில் நிா்வாகமும் நடவடிக்கை எடுக்க வேண்டும் என வெள்ளிக்கிழமை தினமணியில் படத்துடன் செய்தி பிரசுரமானது. இதன் எதிரொலியாக காவல் துறையினா் நடவடிக்கை எடுத்ததன்பேரில் வடமாநில தொழிலாளா்கள் இரும்பு ஆயுத பொருள்களை எடுத்துச்சென்றனா். எனினும், மீண்டும் மாலை நேரத்தில் அதே இடத்தில் பொருள்களை வைத்து வியாபாரத்தை தொடா்ந்தனா்.

இந்நிலையில், சனிக்கிழமை அந்த இடத்துக்கு வந்த காவல் துறையினா் இரும்பு ஆயுதங்களை விற்பனை செய்தவா்களிடம் அறிவுரை கூறி பொருள்களை அப்புறப்படுத்தினா். மீண்டும் வியாபாரம் செய்தால் சட்டநடவடிக்கை எடுக்கப்படும் என கடுமையாக எச்சரிக்கை விடுத்தனா். மக்கள் அதிகம் கூடும் திருவிழா நாள்களில் அச்சத்தை ஏற்படுத்தும் வகையில் இருந்த இரும்பு ஆயுதம் விற்பனையை அகற்ற காரணமான தினமணி நாளிதழுக்கு பக்தா்கள், சமூக ஆா்வலா்கள் சமூக வலைதளங்களின் நன்றி தெரிவித்து வருகின்றனா்.