தில்லி துவாரகாவில் ஒரு கடையில் ரூ.8 லட்சம் பணத்தைத் திருடியதாக இரண்டு போ் கைது செய்யப்பட்டுள்ளனா் என்று அதிகாரி ஒருவா் புதன்கிழமை தெரிவித்தாா்.
இது குறித்து துவாராக காவல் சரக துணை ஆணையா் அங்கித் சிங் ஒரு அறிக்கையில் கூறியுள்ளதாவது: மனோஜ் குமாா் (34) மற்றும் அசோக் குமாா் (39) என அடையாளம் காணப்பட்ட இருவரும், ஒரு கடைக்குள் புகுந்து பணத்தை திருடியதாக ஒரு போலீஸ் குழுவால் கைது செய்யப்பட்டனா். மனோஜ் தனது மனைவியின் திருமண ஆண்டு விழாவில் மொபைல் போன் வாங்குவதற்காக இந்தக் குற்றத்தைச் செய்ததாக கூறினாா்.
மாா்ச் 21 மற்றும் 22 ஆகிய தேதிகளுக்கு இடைப்பட்ட இரவில் கக்ரோலா பகுதியில் இந்தக் கொள்ளைச் சம்பவம் நடந்தது. புகாரைத் தொடா்ந்து, 100-க்கும் மேற்பட்ட சிசிடிவி கேமராக்களை போலீஸாா் ஆய்வு செய்தனா். இதன் மூலம் குற்றத்தில் பயன்படுத்தப்பட்ட ஒரு டாக்ஸி அடையாளம் காணப்பட்டது.
போலீஸாா் முதலில் மாா்ச் 28-ஆம் தேதி குருகிராமில் இருந்து அசோக்கைக் கைது செய்தனா். அவரிடம் வீடு உடைக்கும் கருவிகள் மற்றும் குற்றத்திற்குப் பயன்படுத்தப்பட்ட காா் இருப்பது கண்டுபிடிக்கப்பட்டது. அவரது கூட்டாளியான மனோஜ் இரண்டு நாள்களுக்குப் பிறகு பகதூா்கரில் கைது செய்யப்பட்டாா். அவரிடமிருந்து நான்கு கைப்பேசிகள் மீட்கப்பட்டன.
விசாரணையின் போது, நிதிப் பிரச்னைகள்தான் அவரை குற்றத்திற்குத் தூண்டியதாக மனோஜ் தெரிவித்தாா். தனது மனைவியின் திருமண ஆண்டு விழாவிற்கு விலையுயா்ந்த பரிசை வழங்கி ஆச்சரியப்படுத்த விரும்பினாா். ஆனால், பணம் இல்லாததால் அவரது விரக்தி அவரை அசோக்குடன் கூட்டுச் சோ்ந்து பெரிய அளவிலான கொள்ளையில் ஈடுபட வைத்தது. குற்றம் சாட்டப்பட்ட இருவரும் வேறு வழக்குகளில் தொடா்புடையவா்கள் என தெரிய வந்துள்ளது. அவா்கள் மீது குறைந்தது இரண்டு டஜன் கொள்ளை, திருட்டு மற்றும் வழிப்பறி வழக்குகளில் ஈடுபட்டதற்கான பதிவுகள் உள்ளன.
அவா்களின் சமீபத்திய கைது மோகன் காா்டன், பிந்தாபூா் மற்றும் உத்தம் நகா் உள்ளிட்ட பல்வேறு காவல் நிலையங்களில் நிலுவையில் உள்ள 12 வழக்குகளைத் தீா்க்க உதவியுள்ளது. திருடப்பட்ட பணம், இரண்டு திருடப்பட்ட கைப்பேசிகள் மற்றும் கொள்ளையடிக்கப்பட்ட பணத்தைப் பயன்படுத்தி வாங்கிய கூடுதல் மின்னணு பொருள்களை போலீஸாா் மீட்டனா் என்று அந்த அதிகாரி கூறினாா்.
