மோகனூா் வட்டத்தில் ‘உங்களைத் தேடி உங்கள் ஊரில்’ திட்ட முகாம் வரும் 20-ஆம் தேதி நடைபெற உள்ளது.
இதுகுறித்து மாவட்ட ஆட்சியா் ச.உமா வெளியிட்ட செய்திக் குறிப்பு:
தமிழக அரசின் நலத் திட்டங்கள் மற்றும் சேவைகள் பொதுமக்களுக்கு விரைவில் கிடைக்க வேண்டும் என்பதற்காக, முதல்வரால் தொடங்கப்பட்டுள்ள திட்டங்களில் ஒன்று ‘உங்களைத் தேடி உங்கள் ஊரில்’ திட்டம் ஆகும்.
இந்த திட்டத்தின் கீழ் ஒட்டுமொத்த மாவட்ட நிா்வாகமும், ஒரு நாள் வட்ட அளவில் தங்கியிருந்து கள ஆய்வை மேற்கொள்வா். குறிப்பாக, அரசுத் துறை அலுவலகங்களை ஆய்வு செய்தும், மக்களின் குறைகளைக் கேட்டறிந்தும், அனைத்து நலத் திட்டங்களும், சேவைகளும் மக்களுக்கு தடையின்றி சென்றடைவதை உறுதி செய்வா்.
அந்த வகையில், மோகனூா் வட்டத்தில் நவ. 20-இல் ‘உங்களைத் தேடி உங்கள் ஊரில்’ திட்ட முகாம் நடைபெற உள்ளது. ஏற்கெனவே, கடந்த 13-ஆம் தேதி வருவாய்த் துறை, ஊரக வளா்ச்சித் துறை அதிகாரிகளிடம் மக்கள் வழங்கிய கோரிக்கை மனுக்கள் மீது அன்று தீா்வு காணப்படும் என தெரிவிக்கப்பட்டுள்ளது.
