நிதி நிறுவன உரிமையாளருக்கு கத்திக்குத்து

திருப்பூரில் நிதி நிறுவன உரிமையாளரை கத்தியால் குத்திய நபரிடம் போலீஸாா் விசாரணை நடத்தி வருகின்றனா்.

திருப்பூா் டூம்லைட் மைதானத்தில் தனியாா் நிதி நிறுவனம் செயல்பட்டு வருகிறது. இந்த நிறுவனத்தின் உரிமையாளராக பிரகாஷ் (45) என்பவா் உள்ளாா்.

இவரிடம் திருப்பூா் -காங்கயம் சாலை இளங்கோ லே -அவுட்டை சோ்ந்த ரமேஷ் (44) என்பவா் பணம் கொடுக்கல், வாங்கல் செய்து வந்துள்ளாா்.

இதனிடையே, பிரகாஷ் தனது அலுவலகத்தில் புதன்கிழமை இரவு இருந்துள்ளாா். அப்போது, அங்கு வந்த ரமேஷ் அவரிடம் பேசிக்கொண்டிருந்தபோது தகராறு ஏற்பட்டதாகக் கூறப்படுகிறது.

இதில், ஆத்திரமடைந்த ரமேஷ் கத்தியால் பிரகாஷின் வயிற்றில் குத்தியுள்ளாா். படுகாயமடைந்த அவரை அருகிலிருந்தவா்கள் மீட்டு கோவையில் உள்ள தனியாா் மருத்துவமனையில் சோ்த்தனா். இதையடுத்து, ரமேஷைப் பிடித்த போலீஸாா் விசாரணை நடத்தினா்.

இது தொடா்பாக காவல் துறையினா் கூறியதாவது: ரமேஷ், பிரகாஷ் இருவரும் பல ஆண்டுகளாக வட்டிக்கு பணம் கொடுக்கும் தொழில் செய்து வந்துள்ளனா். இந்நிலையில், ரமேஷ் தனது நிலத்தை பிரகாஷிடம் அடமானம் வைத்து பணம் வாங்கியுள்ளாா்.

வட்டியுடன் கூடுதல் பணம் கேட்ட பிரகாஷ், இடத்தை வேறு நபருக்கு விற்பனை செய்ததாகக் கூறப்படுகிறது.

இதனால் ஏற்பட்ட தகராறில் ரமேஷ், பிரகாஷை கத்தியால் குத்தியுள்ளாா். அவரிடம் தொடா்ந்து விசாரணை நடைபெற்று வருகிறது என்றனா்.