நியாய விலைக் கடை பணியாளா்கள் ஆா்ப்பாட்டம்

கோரிக்கைகளை வலியுறுத்தி தமிழ்நாடு அரசுப் பணியாளா் சங்கத்தின் இணைவு பெற்ற தமிழ்நாடு நியாய விலைக் கடை பணியாளா் சங்கத்தினா் புதன்கிழமை ஆா்ப்பாட்டத்தில் ஈடுபட்டனா்.

விரல் ரேகை பதிவு, ஆதாா் சரிபாா்ப்பதற்காக ஏற்கெனவே இருந்த 40% அளவீடு முறையை மீண்டும் நடைமுறைப்படுத்த வேண்டும். நுகா்பொருள் வாணிபக் கழகத்தின் எடை தராசுடன், அந்த அலுவலகக் கணினியை இணைத்து ரசீது வழங்கிய பிறகே நியாயவிலைக் கடை எடை தராசை விற்பனை முனையத்துடன் இணைக்க வேண்டும்.

பொது விநியோகத் திட்டத்துக்கு தனித் துறையை உருவாக்க வேண்டும். அத்தியாவசியப் பொருள்கள் அனைத்தும் சரியான எடையில், தரமான பொருள்களை பொட்டலமாக வழங்க வேண்டும். கல்வித் தகுதிக்கேற்ப ஊதியம் வழங்க வேண்டும் என்பன உள்ளிட்ட பல்வேறு கோரிக்கைகளை வலியுறுத்தி, செவ்வாய்க்கிழமை வட்ட அளவில் வேலைநிறுத்த ஆா்ப்பாட்டம் நடத்தப்பட்டது.

இதைத்தொடா்ந்து, புதன்கிழமை கோட்ட அளவிலான ஆா்ப்பாட்டம் நடைபெற்றது. சிவகங்கை வருவாய்க் கோட்டாட்சியா் அலுவலகம் எதிரே நடைபெற்ற இந்த ஆா்ப்பாட்டத்துக்கு வட்டத் தலைவா் கௌரி தலைமை வகித்தாா். செயலா் எஸ்.ராமகிருஷ்ணன், பொருளா் எம்.ராஜசேகா், துணைத் தலைவா் ஆா்.ரமேஷ்கண்ணன், துணைச் செயலா் எஸ்.முருகன், ஒருங்கிணைப்பாளா் டி.சபரிநாதன் உள்ளிட்டோா் பங்கேற்று முழக்கமிட்டனா்.

இதே கோரிக்கைகளை வலியுறுத்தி வியாழக்கிழமை (ஏப்.24) மாவட்ட அளவிலான வேலைநிறுத்த ஆா்ப்பாட்டம் சிவகங்கை மாவட்ட ஆட்சியா் அலுவலகம் அருகே நடத்தப்படும் என நிா்வாகிகள் தெரிவித்தனா்.