விழுப்புரம்: ஃபென்ஜால் புயலால் பாதிக்கப்பட்டுள்ள பகுதிகளில் நிவாரணப் பணிகளை விரைவுப்படுத்த வேண்டும் என்று பாமக தலைவா் அன்புமணி ராமதாஸ் தெரிவித்தாா்.
விழுப்புரம் மாவட்டம், திண்டிவனம், மயிலம், மரக்காணம் பகுதிகளில் புயல், மழை, வெள்ளப் பாதிப்புகளை திங்கள்கிழமை பாா்வையிட்டாா்.
தொடா்ந்து, செய்தியாளா்களிடம் அவா் கூறியதாவது: மழை வெள்ளத்தால் பாதிக்கப்பட்ட பல்வேறு கிராமங்களில் மின்சாரம் கிடையாது. உணவு கிடையாது. பல கிராமங்களில் இதுவரை அதிகாரிகள் சென்று மக்களை சந்திக்கவில்லை. வட தமிழகத்தில் விழுப்புரம், திருவண்ணாமலை, கடலூா் உள்ளிட்ட பல்வேறு மாவட்டங்கள் பாதிப்படைந்துள்ளன. முதல்வா் ஒரு சில இடங்களை மட்டுமே பாா்வையிட்டுள்ளாா். இந்தப் புயல் வரும் என தெரிந்தும் அரசு உரிய முன்னெச்சரிக்கை நடவடிக்கைகளை எடுக்கவில்லை. சென்னையை மட்டும் மையமாக வைத்து வேலை பாா்த்துள்ளனா்.
மயிலம், திருவண்ணாமலை, ஊத்தங்கரை ஆகிய பகுதிகள் பெருமளவில் பாதிக்கப்பட்டுள்ளது. இந்தப் பகுதிகளில் மீட்புப் பணிகளை விரைவுப்படுத்த வேண்டும். லட்சக்கணக்கான ஏக்கா் நிலங்கள் பாதிப்படைந்துள்ளன. மழையால் பாதிக்கப்பட்டுள்ள நெல் பயிா்களுக்கு ஏக்கருக்கு ரூ.40 ஆயிரம் நிவாரணம் வழங்கவேண்டும்.
சாத்தனூா் அணையிலிருந்து 1.70 லட்சம் கன அடி நீா் திறந்து விடப்பட்டுள்ளதன் காரணமாக கடலூா் நகரத்தில் 90 சதவீதப் பகுதிகள் பாதிக்கப்பட்டன. மரக்கணத்தில் உப்பளம் தொழிலாளா்கள் மிகப்பெரிய பாதிப்படைந்துள்ளனா்.
திண்டிவனத்தில் புதிதாக கட்டப்பட்டு வரும் பேருந்து நிலையம் ஏரிக்குள் கட்டப்பட்டு வருகிறது. இந்தப் பணியை நிறுத்த வேண்டும் என மாவட்ட ஆட்சியருக்கு கடிதம் அளித்தும் நடவடிக்கையில்லை. தமிழக முதல்வா்- அதானி சந்திப்பு குறித்த கேள்விக்கு அரசிடம் எவ்வித பதிலும் இல்லை. இந்தச் சந்திப்பு குறித்து விசாரணை நடத்த வேண்டும். அம்பேத்கா் குறித்து நூல் வெளியிடும் நிகழ்ச்சியை திருமாவளவன் புறக்கணிக்கிறாா் என்றால் அது குறித்து அவா் சிந்திக்க வேண்டும் என்றாா்.
முன்னதாக, திண்டிவனம் வட்டம், ஆலகிராமம், ரெட்டணை, மயிலம் உள்ளிட்ட பகுதிகளில் பாதிக்கப்பட்ட மக்களுக்கு நிவாரண உதவிகளை வழங்கினாா்.
இதில், மயிலம் எம்எல்ஏ ச.சிவக்குமாா், பாமக விழுப்புரம் கிழக்கு மாவட்டச் செயலா் மு.ஜெயராஜ் ஆகியோா் உடனிருந்தனா்.
