பத்ம விருதாளா்களுக்கு ஆளுநா் ஆா்.என்.ரவி பாராட்டு

தமிழகத்திலிருந்து மத்திய அரசின் பத்ம விருதுகளுக்கு தோ்வு செய்யப்பட்டுள்ளவா்களுக்கு ஆளுநா் ஆா்.என்.ரவி பரிசுகளை வழங்கி பாராட்டு தெரிவித்தாா்.

பத்ம விருதுகளுக்கு தோ்வு செய்யப்பட்டுள்ளவா்களின் பட்டியலை கடந்த ஜன. 25-ஆம் தேதி மத்திய அரசு வெளியிட்டது. இதில் பத்ம விருதுகள் பெறவுள்ள தமிழகத்தைச் சோ்ந்தவா்களுக்கு பாராட்டு விழா சென்னை கிண்டியில் உள்ள ஆளுநா் மாளிகையில் சனிக்கிழமை நடைபெற்றது.

இதில் சிறப்பு அழைப்பாளராகக் கலந்துகொண்ட ஆளுநா் ஆா்.என்.ரவி, தொழிலதிபா் நல்லி குப்புசாமி செட்டி, நடிகையும் பரதநாட்டியக் கலைஞருமான ஷோபனா சந்திரகுமாா், மிருதங்க வித்வான் குருவாயூா் துரை, சிற்பக் கலைஞா் ராதாகிருஷ்ண தேவ சேனாபதி, தெருக்கூத்துக் கலைஞா் புரிசை கண்ணப்ப சம்பந்தன், பறை இசைக் கலைஞா் வேலு ஆசான், இதழியலாளா் லட்சுமிபதி ராமசுப்பையா், சமையல் கலைஞா் கே.தாமோதரன் (தாமு), இயற்பியல் அறிவியலாளா் எம்.டி.ஸ்ரீனிவாஸ் ஆகியோருக்கு நினைவுப் பரிசுகளை வழங்கி பாராட்டுகளைத் தெரிவித்தாா். மேலும், இந்திய கிரிக்கெட் விளையாட்டு வீரா் அஸ்வினுக்குப் பதிலாக அவரது பெற்றோா்கள் நினைவுப் பரிசைப் பெற்றுக்கொண்டனா்.

இதைத் தொடா்ந்து ஆளுநா் ஆா்.என்.ரவி பேசியதாவது:

கலை, தொழில், இலக்கியம் போன்ற பல்வேறு துறைகளில் சமூகத்துக்காக தொண்டாற்றி வரும் அறியப்படாத மனிதா்களைக் கண்டறிந்து அவா்களுக்கு பத்ம விருதுகள் வழங்கப்படுகின்றன. எவ்வித பரிந்துரையும் இன்றி சுதந்திரமான முறையில் இந்த விருதுகள் ஒவ்வொரு ஆண்டும் அறிவிக்கப்பட்டு வருகிறது என்றாா் அவா்.