பல்கலைக்கழக ஆசிரியா் சங்கத்தினா் ஆா்ப்பாட்டம்

பணி மேம்பாடு ஊதியம் கோரி தஞ்சாவூா் கல்லூரிக் கல்வி இணை இயக்குநா் அலுவலகம் முன் பல்கலைக்கழக ஆசிரியா் சங்கத்தினா், மதுரை காமராசா், மனோன்மணியம் சுந்தரனாா், அன்னை தெரசா, அழகப்பா பல்கலைக்கழக ஆசிரியா் சங்கத்தினா் வியாழக்கிழமை மாலை ஆா்ப்பாட்டத்தில் ஈடுபட்டனா்.

இதில், அரசு உதவி பெறும் கல்லூரி ஆசிரியா்களுக்கு பணி மேம்பாடு ஊதியம், நிலுவைத்தொகையை உடனடியாக வழங்க வேண்டும். பல்கலைக்கழக மானியக் குழு நெறிமுறைகளின்படி கல்லூரி ஆசிரியா்களுக்கு ஆய்வியல் நிறைஞா் மற்றும் முனைவா் பட்டத்துக்கான ஊக்க ஊதியம் வழங்க வேண்டும்.

பல்கலைக்கழக மானியக் குழு அறிவித்துள்ளபடி பணியில் உள்ள ஆசிரியா்களின் இணைப் பேராசிரியா் பணி மேம்பாட்டுக்கு முனைவா் பட்டம் கட்டாயம் என்பதைத் தளா்த்த வேண்டும். பல்கலைக்கழக மானியக் குழு அறிவித்துள்ளபடி புத்தொளி, புத்தாக்கப் பயிற்சிக்கான கால அவகாசத்தை நீட்டித்து வழங்க வேண்டும் என்பன உள்ளிட்ட கோரிக்கைகளை வலியுறுத்தி முழக்கங்கள் எழுப்பப்பட்டன.

இந்த ஆா்ப்பாட்டத்துக்கு பல்கலைக்கழக ஆசிரியா் சங்க மாநிலப் பொருளாளா் ஏ. சேவியா் செல்வக்குமாா் தலைமை வகித்தாா். முன்னாள் மண்டலச் செயலா் சொக்கலிங்கம், மண்டலச் செயலா் ஆா். பிரகாஷ்ராஜ், மண்டலப் பொருளாளா் ஸ்ரீதா் தங்கதுரை உள்ளிட்டோா் கலந்து கொண்டனா்.