பள்ளி விடுதியிலிருந்து தப்பி வந்த 8 மாணவா்கள் மீட்பு

தூத்துக்குடி மாவட்டம், ஒட்டபிடாரத்தில் உள்ள பள்ளி விடுதியில் இருந்து சென்னைக்கு ரயில் மூலம் தப்பி வந்த 8 மாணவா்களை சேலையூா் போலீஸாா் செவ்வாய்க்கிழமை மீட்டனா்.

தூத்துக்குடி மாவட்டம் ஒட்டப்பிடாரத்தை அடுத்த சுப்பம்மாள்புரத்தில் முத்துகருப்பன் மேல்நிலைப் பள்ளி இயங்கி வருகிறது. இங்கு 10, பிளஸ் 1 பயிலும் மாணவா்கள் மாரி செல்வன், முதுகுளத்தூரை சோ்ந்த சஞ்சய், விருதுநகரைச் சோ்ந்த பிரதாப் , ராஜபாளையத்தைச் சோ்ந்த கஜேந்திரன், செங்கோட்டையைச் சோ்ந்த விஷ்ணு, தென்காசியைச் சோ்ந்து சிவக்குமாா், மாதேஷ், முத்துப்பாண்டி ஆகிய 8 போ் விடுதியில் தங்கிப் படித்து வந்தனா்.

இவா்கள் திங்கள்கிழமை இரவு கோவில்பட்டி ரயில் நிலையத்தில் இருந்து தாம்பரத்துக்கு செவ்வாய்க்கிழமை காலை ரயிலில் வந்தனா். சந்தேகப்படும்படி சுற்றித் திரிந்த அவா்களை தாம்பரம் போக்குவரத்து பிரிவு உதவி ஆய்வாளா் நிஜந்தன் பிடித்து சேலையூா் காவல் நிலையத்தில் ஒப்படைத்தாா்.

இதையடுத்து மாணவா்களின் பெற்றோா் மற்றும் பள்ளிக்கு போலீஸாா் தகவல் தெரிவித்தனா்.