மனைவியைப் பிரியும் ஏ.ஆர். ரஹ்மான்! தனியுரிமையை மதிக்குமாறு கோரும் மகன்!
பல்லுயிா் வாழிடமான மதுரை அருகேயுள்ள அரிட்டாபட்டியில் டங்ஸ்டன் சுரங்கம் அமைக்க தமிழக அரசு அனுமதிக்கக் கூடாது என்று பாமக தலைவா் அன்புமணி ராமதாஸ் வலியுறுத்தியுள்ளாா்.
இது தொடா்பாக அவா் செவ்வாய்க்கிழமை வெளியிட்ட அறிக்கை: மதுரை மாவட்டம் அரிட்டாபட்டி உள்ளிட்ட பகுதிகளில் 2,015 ஏக்கா் பரப்பளவில் டங்ஸ்டன் சுரங்கம் அமைக்க வேதாந்தா நிறுவனத்துக்கு சொந்தமான ஹிந்துஸ்தான் ஜிங்க் நிறுவனத்துக்கு மத்திய அரசு அனுமதி அளித்துள்ளது கண்டிக்கத்தக்கது.
அரிட்டாபட்டி , மீனாட்சிபுரம் ஆகிய கிராமங்களில் 193.215 ஹெக்டோ் பரப்பளவு பகுதிகளை பல்லுயிா் பாரம்பரியத் தலமாக தமிழக அரசு அறிவித்துள்ளது. ஏழு சிறிய குன்றுகள் இந்தத் தலத்துக்குள் அடங்குகின்றன. இவை 250 வகை பறவைகளுக்கு வாழ்விடமாக உள்ளன. தனித்துவம் மிக்க இந்த மலைப்பரப்பு 72 ஏரிகள், 200 இயற்கை நீரூற்றுக் குளங்களுக்கான ஆதாரமாக திகழ்கிறது. இப்பகுதியில், 2,200 ஆண்டுகள் பழைமையான தமிழி எழுத்துக் கல்வெட்டுகள், சமணா் படுக்கைகள் மற்றும் குடைவரை கோயில்கள் ஆகியவையும் உள்ளன.
டங்ஸ்டன் சுரங்கம் அமைக்கப்பட்டால் அரிட்டாபட்டி பகுதியில் உள்ள பல்லுயிா் வாழிடங்களும், புராதனப் பெருமைமிக்க சின்னங்களும் முற்றிலுமாக அழிக்கப்பட்டு விடும். ஹிந்துஸ்தான் ஜிங்க் நிறுவனம் விண்ணப்பித்தாலும் அரிட்டாபட்டியில் டங்ஸ்டன் சுரங்கத்தை அமைக்க தமிழக அரசு அனுமதிக்கக் கூடாது என்று அன்புமணி கூறியுள்ளாா்.
இதே கோரிக்கையை அமமுக பொதுச்செயலா் டிடிவி தினகரனும் வலியுறுத்தியுள்ளாா்.
