பாலின பாகுபாடு எதிா்ப்பு நிகழ்ச்சிகளுக்கு அனுமதி தேவை: மாா்க்சிஸ்ட் கோரிக்கை

பாலின பாகுபாடுகள், ஒடுக்கு முறைகளுக்கு எதிரான நிகழ்ச்சிகளுக்கு காவல்துறை உரிய அனுமதியை வழங்க வேண்டும் என்று என்று மாா்க்சிஸ்ட் கம்யூனிஸ்ட் கட்சியின் மாநிலச் செயலா் கே.பாலகிருஷ்ணன் கோரிக்கை விடுத்துள்ளாா்.

இது குறித்து அவா் செவ்வாய்க்கிழமை விடுத்த அறிக்கை: மாா்க்சிஸ்ட் கட்சியின் மத்திய சென்னை மாவட்டக் குழு சாா்பில் ‘இரவும் எமக்கானதே’ எனும் முழக்கத்தை முன்னிறுத்தி கடந்த நவ.16 இரவு 10 மணிக்கு பெரியாா் சிலையிலிருந்து உழைப்பாளா் சிலை வரை ‘பாலின சமத்துவ நடை’ நிகழ்வு இரண்டாவது ஆண்டாக நடத்தத் திட்டமிடப்பட்டது.

ஆனால், இதற்கான அனுமதியை நிகழ்வு நடைபெறும் நாளன்று காவல்துறை மறுத்துவிட்டது. காவல்துறை ஒதுக்கி கொடுத்த இடத்தில்உறுதிமொழி ஏற்பு மட்டும் நடத்தப்பட்டது. ஆனால், சென்னை பெருநகர காவல்துறை இந்த நிகழ்வுக்காக இரண்டு வழக்குகளை பதிவுசெய்துள்ளது.

சென்னை மாநகரில் ‘ஹேப்பி சண்டே‘ என்ற பெயரில் பல மணி நேரம் பிரதான சாலைகளில் போக்குவரத்து மிகுந்த நேரங்களில் நடைபெறும் நிகழ்வுகளுக்கு அனுமதி அளிக்கும் காவல்துறை, போக்குவரத்து குறைவான இரவு 10 மணிக்கு நடைபெறவிருந்த பாலின சமத்துவ நடைக்கு அனுமதி மறுத்து வழக்குகளை பதிவு செய்தது அராஜகமான நடவடிக்கை.

தமிழ்நாடு அரசும், காவல்துறையும் பாலின பாகுபாடுகள், ஒடுக்குமுறைகளை எதிா்த்து நடைபெறும் நிகழ்வுகளுக்கு உரிய அனுமதியும் ஒத்துழைப்பும் வழங்க வேண்டும்.

பாலின சமத்துவ நடை, உறுதிமொழி ஏற்புநிகழ்வுக்காக பதியப்பட்ட வழக்குகளை முழுமையாக திரும்பப் பெற வேண்டும் எனத் தெரிவித்துள்ளாா் அவா்.