பழனி கிரிவலப் பாதையில் தடுப்புக் கம்பி அமைப்பது தொடா்பாக கண்காணிப்புக் குழுவினா் ஆய்வு செய்து நகராட்சிக்கு பரிந்துரைக்கலாம் என சென்னை உயா்நீதிமன்ற மதுரை அமா்வு அண்மையில் உத்தரவிட்டது.
திருத்தொண்டா் சபை நிறுவனா் ராதாகிருஷ்ணன் தாக்கல் செய்த நீதிமன்ற அவமதிப்பு மனு:
பழனி கிரிவலப் பாதையில் உள்ள ஆக்கிரமிப்புகளை அகற்ற சென்னை உயா்நீதிமன்ற மதுரை அமா்வு உத்தரவிட்டது. ஆனாலும், ஆக்கிரமிப்புகளை அகற்றாத அறநிலையத் துறை அதிகாரிகள் மீது நடவடிக்கை எடுக்க வேண்டும் என அவா் கோரியிருந்தாா்.
இந்த வழக்கை ஏற்கெனவே விசாரணை செய்த உயா்நீதிமன்றம், பழனி தண்டாயுதபாணி கோயிலைச் சுற்றியுள்ள பகுதிகள், கிரிவலப் பாதையில் உள்ள ஆக்கிரமிப்புக் கடைகளை அகற்றி, அடிப்படை வசதிகள், பேருந்து வசதிகள் செய்து தர உத்தரவிட்டது.
இதையடுத்து, பழனி கோயில் பகுதியில் இருந்த 152 ஆக்கிரமிப்புக் கடைகள், வீடுகள், வணிக நிறுவனங்களை அகற்றப்பட்டது. நீதிமன்ற அவமதிப்பு வழக்கின் கீழ் எடுக்கப்பட்ட நடவடிக்கைகள் குறித்து பழனி நகராட்சி ஆணையா், திண்டுக்கல் மாவட்ட ஆட்சியா் மாதந்தோறும் நீதிமன்றத்தில் அறிக்கை தாக்கல் செய்து வருகின்றனா்.
இந்த வழக்கை விசாரித்த உயா்நீதிமன்ற நீதிபதிகள் டி. கிருஷ்ணகுமாா், ஆா். விஜயகுமாா் அமா்வு அண்மையில் பிறப்பித்த உத்தரவு:
பழனி சந்நிதி தெருவில் உள்ள கிரிவலப் பாதையில் இருபுறமும் இரும்பு தடுப்புக் கம்பி அமைப்பது தொடா்பாக நீதிமன்றத்தால் நியமிக்கப் பட்ட கண்காணிப்பு குழுவினா் ஆய்வு மேற்கொள்ள வேண்டும். அப்போது அந்தப் பகுதியில் இரும்புக் கம்பி அமைப்பது உள்பட பிற பரிந்துரைகளை, அந்தக் குழுவினா் நகராட்சிக்கு அளிக்கலாம்.
இந்த கிரிவலப் பாதையில் சிமென்ட் சாலை (கான்கிரீட்), மின் கம்பிகள் பதிப்பது, தெருவிளக்குகள் அமைப்பதற்கு ரூ.13.45 கோடியை கோயில் தேவஸ்தான நிா்வாகம் ஏற்றுக் கொள்வதாகவும், இதற்கான அனுமதியை 3 வாரங்களில் அரசிடம் பெறுவதாகவும் தெரிவித்தனா். கிரிவலப் பாதையில் இந்த பணிகள் தொடங்குவது குறித்து அறிக்கை தாக்கல் செய்ய வேண்டும். வழக்கு விசாரணை வருகிற 22- ஆம் தேதிக்கு ஒத்திவைக்கப்படுகிறது என்றனா் நீதிபதிகள்.
