பழைய கார்களின் விலை உயருமா? ஜிஎஸ்டி உயர்கிறது..!

மத்திய நிதியமைச்சா் நிா்மலா சீதாராமன் தலைமையில் 55-ஆவது ஜிஎஸ்டி கவுன்சில் கூட்டம் சனிக்கிழமை நடைபெற்றது. இதில் மத்திய நிதித்துறை இணையமைச்சா் பங்கஜ் செளதரி, பல்வேறு மாநிலங்களின் முதல்வா்கள், துணை முதல்வா்கள், மாநில, யூனியன் பிரதேசங்களின் நிதியமைச்சா்கள் உள்ளிட்டோா் பங்கேற்றனா்.

இதில் பல்வேறு பரிந்துரைகளை மத்திய அரசுக்கு ஜிஎஸ்டி கவுன்சில் சனிக்கிழமை வழங்கியது. ஆட்டோமொபைல் துறையைப் பொறுத்தவரையில், மின்சார வாகனங்கள் உள்பட அனைத்து பழைய மற்றும் பயன்படுத்தப்பட்ட வாகன விற்பனைக்கான ஜிஎஸ்டியை 12 சதவீதத்தில் இருந்து 18 சதவீதமாக அதிகரிக்க வேண்டும் என்று அந்த கவுன்சில் பரிந்துரைத்தது.

இந்த நிலையில், புதிய பரிந்துரைகளின்படி பழைய மற்றும் பயன்படுத்தப்பட்ட வாகன விற்பனைக்கான ஜிஎஸ்டி உயர்த்தப்பட்டால் பழைய கார்களின் விலை உயருமென்றாலும், இதனால் தனிநபர் மீது பெரியளவிலான தாக்கம் ஏற்படாது என ஆட்டோமொபைல் துறை சார் வட்டாரங்கள் தெரிவிக்கின்றன.

பதிவு செய்யப்பட்ட முகவர்கள் அல்லது நிறுவனங்கள் மூலம் பழைய கார்கள் விற்பனையாகும்போது அதற்கு ஜிஎஸ்டி கூடுதலாக விதிக்க பரிந்துரைக்கப்பட்டுள்ளது. அதிலும் காரின் விலை மீது ஜிஎஸ்டி உயர்த்தப்படவில்லை. மேற்கண்ட விற்பனையாளர்கள் கார் விற்பனையால் பெறுகின்ற லாபத்தில் ஜிஎஸ்டி உயர்த்தப்படும்.

அதேவேளையில், எந்தவொரு தனி நபரும் பழைய கார்களை விற்றால் அல்லது வாங்கினால் இந்த ஜிஎஸ்டி உயர்வு பொருந்தாது. அவர்கள் கூடுதல் வரி செலுத்த வேண்டாம்.

எனினும், மேற்கண்ட விற்பனை நிறுவனங்கள் விரைவில் அமல்படுத்தப்படவுள்ளதாகக் கூறப்படும் வரி உயர்வை வாடிக்கையாளர்கள் மீதே திணிக்கும் என்பதால் பழைய கார்களின் விலையும் சற்று உயருமென்றே கள நிலவரங்கள் தெரிவிக்கின்றன.

முன்னதாக, பழைய பயன்படுத்தப்பட்ட கார்களைப் பொறுத்தவரை, இன்ஜின் திறன் 1,200 சி.சி. வரையுள்ள சிறிய ரக கார்களுக்கான ஜிஎஸ்டி விகிதம் 12 சதவிகிதமாக நிர்ணயிக்கப்பட்டிருந்தது. அதே வேளையில், கூடுதல் திறன் வாய்ந்த பெரிய ரக கார்களுக்கு 18 சதவிகிதம் ஜிஎஸ்டி நிர்ணயிக்கப்பட்டிருந்தது.

கடந்த 2018-க்கு முன்பு வரை, இதே கார்களுக்கு 28 சதவிகித ஜிஎஸ்டி-யும், அத்துடன் சேர்த்து செஸ் வரி 1 - 15 சதவிகிதமும் வசூலிக்கபட்ட நிலையில், அதனைத்தொடர்ந்து, ஜிஎஸ்டி கவுன்சிலின் பரிந்துரைகளுக்குப்பின் ஜிஎஸ்டியில் மேற்கண்ட தளர்வு அமலானது.

இந்த நிலையில், ஜிஎஸ்டி கவுன்சிலின் புதிய பரிந்துரைகளுக்குப்பின், மின்சார கார்கள் உள்பட அனைத்து பழைய கார்களுக்கும் 18 சதவிகித ஜிஎஸ்டி விரைவில் நிர்ணயிக்கப்படுமெனத் தெரிகிறது.