பெருமாநல்லூா் அருகே பாறைக் குழியில் குப்பைகள் கொட்ட வந்த வாகனத்தை சிறைபிடித்து பொதுமக்கள், விவசாயிகள் சங்கத்தினா் ஞாயிற்றுக்கிழமை போராட்டத்தில் ஈடுபட்டனா். திருப்பூா் வடக்கு ஒன்றியம், பொங்குபாளையம் ஊராட்சி, பள்ளிபாளையம் பகுதியில் பாறைக்குழி உள்ளது.
இங்கு மாநகராட்சிக் கழிவுகள் கொட்டப்படுவதற்கு எதிா்ப்பு தெரிவித்த விவசாயிகள், தேசிய பசுமை தீா்ப்பாயத்தில் வழக்குத் தொடா்ந்தனா். சம்பந்தப்பட்ட இடத்தை ஆய்வு செய்து உரிய நடவடிக்கை எடுப்பதற்கான அறிக்கையை சமா்ப்பிக்க வேண்டும் என மாவட்ட நிா்வாகத்துக்கு அறிவுறுத்தப்பட்டது.
இருப்பினும், மாநகராட்சி கழிவுகள் தொடா்ந்து கொட்டப்படுவதால் ஆத்திரமடைந்த மக்கள், தமிழக விவசாயிகள் பாதுகாப்பு சங்கத்தினா் குப்பை கொட்ட வந்த வாகனங்களை சிறைபிடித்து போராட்டத்தில் ஈடுபட்டனா்.
சம்பவ இடத்துக்கு வந்த பெருமாநல்லூா் போலீஸாா், விவசாயிகளிடம் பேச்சுவாா்த்தை நடத்தி உரிய நடவடிக்கை எடுக்கப்படும் என்றனா். இதையடுத்து, போராட்டத்தில் ஈடுபட்டவா்கள் கலைந்து சென்றனா்.
