பிரசவ இறப்புக்கு மருத்துவா்கள் மீது பழி சுமத்த வேண்டாம்!

மருத்துவமனைகளில் நடைபெறும் பிரசவத்தின்போது தாய் - சேய் இறப்பு ஏற்பட்டால், மருத்துவா்களை பொறுப்பாக்கி அவா்கள் மீது பழி சுமத்த வேண்டாம் என நாமக்கல் மாவட்ட மகளிா் மருத்துவம் மற்றும் மகப்பேறு மருத்துவா்கள் சங்கத்தினா் வேண்டுகோள் விடுத்துள்ளனா்.

நாமக்கல்லில் செவ்வாய்க்கிழமை அச்சங்கத்தின் தலைவா் மருத்துவா் எம்.சந்திரா பொன்னுசாமி செய்தியாளா்களிடம் கூறியதாவது: மகளிா் நலன், தாய் - சேய் நலம் சாா்ந்த ஒருங்கிணைந்த மருத்துவ சேவைகளை வழங்குவதில் பெண் மருத்துவா்கள் முக்கியப் பங்காற்றுகின்றனா். இதனால், மற்ற மாநிலங்களைவிட தமிழகத்தில் பிரசவத்தின்போது தாய் - சேய் இறப்பு விகிதம் குறைந்து காணப்படுகிறது.

இந்த நிலையில், பிரசவத்தின்போது தாய், சேய் எதிா்பாராதவிதமாக இறக்க நேரிட்டால் அதற்கு மருத்துவா்கள்தான் காரணம் என அவா்களை பொறுப்பாக்குவதும், பழிசுமத்துவதும் முறையல்ல. அதேபோல, மருத்துவமனைகளின் தரத்தை கணக்கிட்டு இறப்புக்கான காரணத்தைக் கண்டறிவதும் தவிா்க்கப்பட வேண்டும்.

ஒவ்வொரு பிரசவத்தின்போதும், சுகப்பிரசவம் ஏற்படுவதையே மருத்துவா்கள் விரும்புகின்றனா். மன உளைச்சல் மற்றும் மிகுந்த சவால்களுக்கிடையே சுகப்பிரசவங்களை மேற்கொள்வதில் பெண் மருத்துவா்கள் இரவு, பகல் பாராமல் பணியாற்றி வருகின்றனா். ஆனால், திடீரென ஏற்படும் இறப்பு சம்பவங்களால் மருத்துவா்கள் தேவையற்ற அச்சத்துக்கு தள்ளப்படுகின்றனா். இதனால், பெண் மருத்துவா்கள் மகப்பேறு துறையை விட்டு மாற்றுத் துறையை தோ்ந்தெடுத்து செல்கின்றனா்.

வரும் காலங்களில் மகப்பேறு மருத்துவா்களின் எண்ணிக்கை குறையவும் வாய்ப்பு உள்ளது. மேலும், ஒரு பிரசவத்தின்போது தாய் - சேய் இறப்பு ஏற்பட்டால், முதல்கட்ட ஆய்வில் அந்தத் துறை சாா்ந்த வல்லுநரின் அறிவுரையைப் பெற்ற பிறகே, மருத்துவத் துறை உயா் அதிகாரிகளுக்கு இறப்பு சம்பவம் தொடா்பான அறிக்கையை பரிந்துரைக்க வேண்டும்.

தற்போதைய காலகட்டத்தில் காலதாமதமான திருமணம், உடல் எடை அதிகரிப்பு, உயா் ரத்த அழுத்தம், சா்க்கரை நோய் பாதிப்பு உள்ளிட்டவை காணப்படுகின்றன. இதனால் பிரசவத்தின்போது குழந்தையை எடுப்பதில் மிகுந்த சிக்கல் ஏற்படுகிறது. அப்போது, தாய் - சேய் மரணிக்காமல் உயிருடன் மீட்டெடுக்க மருத்துவா்கள் முயற்சிக்கின்றனா்.

திடீரென பிரசவத்தின் போது பெண் இறக்க நேரிட்டால், அது பற்றிய அறிக்கையை ஏற்பதற்கு அவரது குடும்பத்தினா் தயாராக இல்லை. அதற்கு மாறாக மருத்துவா்களை மிரட்டும் போக்குதான் உள்ளது. மகப்பேறு மருத்துவமனைகளையும், மருத்துவா்களையும் பாதுகாக்கும் வகையிலான நடவடிக்கைகளை தமிழக அரசு மேற்கொள்ள வேண்டும் என்றாா்.

இந்த பேட்டியின்போது, மகப்பேறு மருத்துவா்கள் சங்கச் செயலாளா் ஏ.கவிதா சரவணகுமாா், துணைத் தலைவா்கள் ஏ.அழகம்மாள், எம்.மல்லிகா குழந்தைவேல், பொருளாளா் எம்.திருமொழி கண்ணப்பன் உள்ளிட்டோா் உடனிருந்தனா்.