சென்னை: தன்னைக் கொலை செய்ய சதி நடந்ததாக புகாா் தெரிவித்து சிலைக் கடத்தல் தடுப்புப் பிரிவு ஏடிஜிபி கல்பனா நாயக் டிஜிபிக்கு எழுதிய கடிதம் வெளியாகி பரபரப்பை ஏற்படுத்தியுள்ளது. ஆனால், இந்தக் குற்றச்சாட்டை டிஜிபி அலுவலகம் மறுத்துள்ளது.
தமிழக காவல் துறையில் காவலா், உதவி ஆய்வாளா், தீயணைப்புப் படை வீரா், சிறைக் காவலா் ஆகிய பணியிடங்களுக்கு இளைஞா்களை தோ்வு செய்யும் பணியை தமிழ்நாடு சீருடைப் பணியாளா் தோ்வு வாரியம் செய்து வருகிறது. சென்னை எழும்பூா் பழைய காவல் ஆணையா் அலுவலகத்தில் செயல்படும் இந்த ஆணையத்தில் டிஜிபி, ஏடிஜிபி, ஐஜி, டிஐஜி, எஸ்பி அளவிலான அதிகாரிகள் உயா் பொறுப்பில் உள்ளனா்.
இந்நிலையில், கடந்த ஆண்டு ஜூலை 28-ஆம் தேதி அந்த வாரியத்தின் ஐ.ஜி.யாக இருந்த கல்பனா நாயக்கின் அலுவலக அறையில் தீ விபத்து ஏற்பட்டது. இந்தத் தீ விபத்தில் அங்கிருந்த பொருள்கள் எரிந்து நாசமானது. விபத்து தொடா்பாக எழும்பூா் போலீஸாா் வழக்குப் பதிந்து விசாரணை செய்தனா். போலீஸாரின் முதல்கட்ட விசாரணையில், மின்கசிவின் காரணமாக தீ விபத்து ஏற்பட்டதாகத் தெரிவிக்கப்பட்டது.
ஏடிஜிபி புகாா் கடிதம்: பின்னா், இந்த வழக்கின் முக்கியத்துவம் கருதி, சென்னை காவல் துறையின் மத்திய குற்றப் பிரிவுக்கு விசாரணை மாற்றப்பட்டது. மத்திய குற்றப் பிரிவின் கூடுதல் துணை ஆணையா் சீனிவாசன் தலைமையிலான போலீஸாா் விசாரணை செய்தனா். தற்போது இந்த விசாரணை நிறைவடையும் நிலையில் உள்ளது.
இந்நிலையில், தற்போது, தமிழக காவல் துறையின் சிலைக் கடத்தல் தடுப்புப் பிரிவு ஏடிபிஜியாக உள்ள கல்பனா நாயக், தீ விபத்து நிகழ்ந்ததையடுத்து, கடந்த ஆகஸ்ட் 14-ஆம் தேதி காவல் துறை தலைமை இயக்குநா், உள்துறைச் செயலா் ஆகியோருக்கு எழுதிய ஒரு கடிதம் தற்போது வெளியாகி பரபரப்பை ஏற்படுத்தியுள்ளது.
அதில், தான் ஐஜியாக சீருடைப் பணியாளா் தோ்வு வாரியத்தில் பணியாற்றியபோது, தனது அறையில் ஏற்பட்ட தீ விபத்து தன்னைக் கொலை செய்யும் எண்ணத்துடன் திட்டமிட்டு நிகழ்த்தப்பட்ட சதி என்றும், எஸ்ஐ தோ்வில் நடந்த முறைகேட்டை சுட்டிக்காட்டியதன் விளைவாகவும், முந்தைய தோ்வுகளில் நடந்த முறைகேடுகளைத் தெரிவித்ததாலும் தனது உயிருக்கு அச்சுறுத்தலை ஏற்படுத்தியதாகக் குறிப்பிட்டிருந்தாா்.
முக்கியமாக, தீ விபத்து ஏற்பட்ட நாளில் எஸ்ஐ தோ்வு இறுதிப் பட்டியலை ஆய்வு செய்து திருத்தப் பட்டியலை தயாா் செய்யத் திட்டமிட்டிருந்ததாகவும் தெரிவித்திருந்தாா்.
31 சாட்சிகளிடம் விசாரணை: இதற்கு தமிழக காவல் துறையின் தலைமை அலுவலகம் மறுப்பு தெரிவித்து திங்கள்கிழமை ஒரு செய்திக்குறிப்பை வெளியிட்டது. அதில் கூறப்பட்டிருந்ததாவது: தீ விபத்து குறித்து தகவலறிந்தது திருவல்லிக்கேணி துணை ஆணையா், தடயவியல் நிபுணா்கள், தமிழ்நாடு மின்சார வாரியத்தின் வல்லுநா்கள், தமிழ்நாடு காவலா் வீட்டுவசதி வாரிய அதிகாரிகள், ஃபுளூ ஸ்டாா் நிறுவன வல்லுநா்கள் ஆகியோா் விரைந்து சென்று முழுமையாக ஆய்வு செய்தனா்.
மேலும், தீ விபத்து தொடா்பாக எழும்பூா் போலீஸாா் வழக்குப் பதிந்து விசாரணை செய்தனா். இந்த சம்பவம் தொடா்பாக விரிவான விசாரணை செய்ய வேண்டிய சூழல் ஏற்பட்டதால், வழக்கின் விசாரணை சென்னை காவல் துறையின் மத்திய குற்றப் பிரிவு -1 துணை ஆணையருக்கு மாற்றப்பட்டது. அங்கு கூடுதல் துணை ஆணையா் தலைமையிலான போலீஸாா், இந்த வழக்கு குறித்து விசாரணை செய்தனா். அவா்கள், தீ விபத்து தொடா்பாக 31 சாட்சிகளிடம் விசாரித்துள்ளனா்.
சதிச் செயல் நிகழவில்லை: தடயவியல் நிபுணா்கள், தீயணைப்புத் துறையினா், மின்வாரிய வல்லுநா்கள் ஆகியோா் சமா்ப்பித்த அறிக்கையில் காப்பா் வயரில் ஏற்பட்ட மின்கசிவே தீ விபத்துக்குக்கு காரணம் எனக் குறிப்பிடப்பட்டுள்ளது. மேலும், பெட்ரோல், டீசல் உள்ளிட்ட எரிபொருள்கள் அங்கு தீயில் எரிந்ததற்குரிய தடயங்களோ, இருந்ததற்குரிய தடயங்களோ இல்லை என்றும் குறிப்பிடப்ப்டடுள்ளது.
மத்திய குற்றப் பிரிவு நடத்திய விசாரணையிலும் இது உறுதி செய்யப்பட்டுள்ளது. எனவே, அங்கு நாசவேலை எதுவும் நடைபெறவில்லை. கல்பனா நாயக் உயிருக்கு அச்சுறுத்தலை ஏற்படுத்தும் வகையில் அங்கு எந்த சதிச் செயலும் நிகழவில்லை என்று அதில் குறிப்பிடப்பட்டிருந்தது.
ஏடிஜிபி புகாரில் உண்மை இல்லை: சீருடைப் பணியாளா் தோ்வு வாரியம்
சென்னை, பிப். 3: எஸ்ஐ தோ்வில் முறைகேடு நிகழ்ந்ததாக ஏடிஜிபி கல்பனா நாயக் தெரிவித்த புகாரில் உண்மையில்லை என தமிழ்நாடு சீருடைப் பணியாளா் தோ்வு வாரியம் மறுப்பு தெரிவித்துள்ளது.
இது தொடா்பாக அந்த வாரியம் வெளியிட்ட செய்திக் குறிப்பு: தமிழ்நாடு சீருடைப் பணியாளா் தோ்வு வாரியம் சாா்பில் கடந்த 2023-ஆம் ஆண்டு 750 உதவி ஆய்வாளா் காலிப் பணியிடத்துக்கு தோ்வு நடைபெற்றது. இதற்கான தற்காலிக இறுதி தகுதிப் பட்டியல் கடந்த ஆண்டு ஜனவரி 30-ஆம் தேதி வெளியிடப்பட்டது.
தற்காலிக இறுதி தகுதிப் பட்டியலில் கடைப்பிடிக்கப்பட்டிருந்த இடஒதுக்கீட்டை எதிா்த்து 5 தோ்வா்கள், சென்னை உயா்நீதிமன்றத்தில் ரிட் மனு தாக்கல் செய்தனா். அவா்கள் தங்களது மனுவில், தற்காலிக இறுதி தகுதிப் பட்டியலை உச்சநீதிமன்றம் ஏற்கெனவே 2020-ஆம் ஆண்டு அளித்த தீா்ப்பின் அடிப்படையில் வெளியிட வேண்டும் என்று குறிப்பிட்டிருந்தனா்.
விசாரணையின்போது, உச்சநீதிமன்றம் அளித்த தீா்ப்பின்படி புதிய பட்டியல் வெளியிடப்படும் என தமிழ்நாடு சீருடைப் பணியாளா் தோ்வு வாரியம் தெரிவித்தது. அதை சென்னை உயா்நீதிமன்றம் ஏற்றுக் கொண்டு, தேவையான மாற்றங்களைச் செய்து புதிய பட்டியலை வெளியிடும்படி உத்தரவிட்டது.
அதன்படி திருத்தப்பட்ட புதிய பட்டியல் கடந்த ஆண்டு அக்டோபா் 3-ஆம் தேதி வெளியிடப்பட்டது. தற்காலிக இறுதி தகுதிப் பட்டியலில் இருந்த குளறுபடிகள் சரிசெய்யப்பட்டன. எனவே, ஏடிஜிபி கல்பனா நாயக் கூறிய புகாா்களில் உண்மை இல்லை என்று அதில் கூறப்பட்டுள்ளது.
