பெண் குழந்தைகள் பாதுகாப்பு திட்டத்தில் விண்ணப்பிப்போருக்கு சேமிப்பு பத்திரம்

முதல்வரின் பெண் குழந்தைகள் பாதுகாப்பு திட்டத்தில் விண்ணப்பிப்போருக்கு தமிழ்நாடு மின்விசை நிதிநிறுவனத்தின் மூலம் சேமிப்பு பத்திரம் வழங்கப்படுகிறது.

இதுகுறித்து திருப்பூா் மாவட்ட ஆட்சியா் தா. கிறிஸ்துராஜ் வெளியிட்டுள்ள செய்திக் குறிப்பு:

முதல்வரின் பெண் குழந்தைகள் பாதுகாப்புத் திட்டத்தில் விண்ணப்பிப்போருக்கு தமிழ்நாடு மின்விசை நிதிநிறுவனத்தின் மூலம் ஒரு பெண் குழந்தையெனில் ரூ. 50 ஆயிரம், 2 பெண் குழந்தையெனில் தலா ரூ. 25 ஆயிரம் சேமிப்பு பத்திரமாக வழங்கப்படும்.

இத்தொகை அந்தக் குழந்தைகளுக்கு 18 வயது நிறைவடைந்து பத்தாம் வகுப்பு தோ்ச்சிப் பெற்றிருந்தால் மட்டுமே வட்டியுடன் முதிா்வுத் தொகை வழங்கப்படுகிறது.

திருப்பூா் மாவட்டத்தில் இத்திட்டத்தில் முதிா்வுத் தொகை பெறவேண்டி விண்ணப்பிக்காமல் உள்ள பயனாளிகள் சேமிப்புப் பத்திரத்துடன், பத்தாம் வகுப்பு மதிப்பெண் சான்றிதழ், மாற்றுச் சான்றிதழ், ஆதாா் அட்டை, வங்கி சேமிப்பு கணக்கு புத்தக நகல்களுடன் 2 பாஸ்போா்ட் அளவு புகைப்படத்துடன் மாவட்ட ஆட்சியா் அலுவலக வளாகத்தில் அறை எண் 35 இல் உள்ள மாவட்ட சமூக நல அலுவலகத்தில் விண்ணப்பிக்கலாம்.