பெரியார் விவகாரம் : `ஆதாரம் இருக்கு... ஆனா இல்ல’ - சீமான் சர்ச்சை பேச்சுக்கு நா.த.க சொல்வதென்ன?

பெரியார் குறித்து, `விமர்சனம்’ என்கிற பெயரில் அவதூறுகளை அள்ளி வீசியிருக்கிறார் ‘நாம் தமிழர் கட்சி’யின் தலைமை ஒருங்கிணைப்பாளர் சீமான் என கொதிக்கிறது திராவிட அமைப்புகள். அதேசமயம் ஆளுநருக்கு ஆதரவான கருத்தை உதிர்திருப்பதும் சர்ச்சையாகியிருக்கிறது. சீமானின் பேச்சுக்கு ஆதாரம் எங்கே? என்ற கேள்வி வலுவாகியிருக்கும் சூழலில் `ஆதாரம் இருக்கு..ஆனா இல்ல’ என மழுப்பி வருகிறார்கள் நாம் தமிழர் கட்சியினர்.

கடந்த ஜனவரி 8-ம் தேதி கடலூரில் செய்தியாளர்களை சந்தித்த சீமான் `பெரியாரை கொள்கை வழிகாட்டி என்றால் எந்த இடத்தில் கொள்கை வழிகாட்டி எனச் சொல்லுங்கள். பெண்ணிய உரிமையிலா? உனக்கு உடல் இச்சை வந்தால் பெற்றா தாயோ மகளோ அக்காவோ தங்கச்சியோ அவரோடு உறவு வைத்துக் கொண்டு சந்தோஷமாக இரு எனச் சொன்னது பெண்ணிய உரிமையா?” எனக் கேட்டார். ஆனால் பெரியார் அவ்வாறு பேசவில்லை என அடித்துச் சொல்கிறார்கள் பெரியாரியவாதிகள்.

மறுபக்கம் ஆளுநர் உரையை படிக்காமல் ஆர்.என் ரவி வெளியேறியது குறித்து எழுந்த கேள்விக்கு தி.மு.க மீது பாய்ந்த சீமான்``நீங்கள் எழுதிக் கொடுத்ததை ஆளுநர் படிக்க வேண்டுமா, இவ்வளவு பொய் பேச வேண்டுமா என்று அவர் படிக்காமல் சென்று விட்டார்” என ஆளுநருக்கான ஆதரவை நல்கினார். பெரியாரைக் கொச்சைப்படுத்தி, திராவிட அரசியலை நீர்த்துப்போகச் செய்வதற்கான சதித்திட்டங்களைத் தொடங்கிவிட்டது ஆரியம். அதன் ஒரு பகுதியாக, சீமானை இயக்குகிறது ஆர்.எஸ்.எஸ் என்கிற விமர்சனத்தை தி.மு.க கூட்டணியினர் முன்வைக்கின்றனர்.

நம்மிடம் பேசிய அரசியல் நோக்கர்கள் ``ஆளுநர் உரைமீது விமர்சனத்தை முன்வைப்பது எதிர்க்கட்சிகளின் உரிமை. ஆனால் ஆளுநர் உரையில் இருப்பதை அப்படியே வாசிப்பதுதான் சட்டமன்ற மரபு. அந்த மரபைமீறி ஆளுநர் உரையை வாசிக்காமல் சென்றதை நியாயப்படுத்துவது என்பது பா.ஜ.க-வின் நிலைப்பாடாக இருக்கிறது. அதையே சீமானும் எடுக்கிறாரா என்ற சந்தேகம் கிளம்புகிறது. அதேபோல் பெரியாரை விமர்சிப்பதும் பாராட்டுவதும் அவரவர் உரிமை ஆனால் பெரியார் சொன்னதாக சீமான் சொல்வதற்கு ஆதாரம் எங்கே? என்பதுதான் அவர் முன்பிருக்கும் கேள்வி. ஆனால் அவரிடம் ஆதாரம் இல்லாததால்தான் நாட்டுடைமையாக்குங்கள் என பிதற்றுகிறார்கள்” என்கிறார்கள்.

இதுகுறித்து விளக்கம்கேட்க நா.த.க-வின் மாணவர் பாசறை மாநிலச் செயலாளர் அபுபக்கரிடம் பேசினோம், ``ஆர்.என் ரவி ஆளுநருக்கான உரையை வாசிக்காமல் வெளியேறியது தவறு என்பதுதான் கட்சியின் நிலைப்பாடு. இவ்விவகாரத்தில் ஆளுநரை கண்டித்து அண்ணன் சீமான் பேசியிருக்கிறார்.

அதேசமயம் ஆளுநர் உரையில் தமிழ்நாட்டின் யதார்த்த சூழலுக்கு எதிரானவற்றை எழுதிக்கொடுத்ததும் தவறு என்கிறார். ஆனால் இதைவைத்து ஆளுநருக்கு ஆதரவான கருத்து எனக் கட்டமைக்கிறார்கள்.

மேலும் பெரியார் விவகாரத்தில் அண்ணன் சொன்ன குறிப்பிட்ட கருத்துக்கு மீளாய்வு செய்து எடுத்துக் கொண்டிருக்கிறோம். குழந்தை பெற்றுக் கொள்ளாமல் உறவு வைத்துக் கொள்வது குறித்து பெரியார் சொன்னதாக வீரமணி பேசியிருக்கிறார். பிறர் மனைவி நோக்குவது தவறல்ல என சேலம் மாநாட்டில் பெரியார் தீர்மானம் நிறைவேற்றினார். இந்த புறநிலை சாட்சிகளை வைத்து அதற்கான தரவுகளை தேடிக் கொண்டிருக்கிறோம். பெரியார் எழுத்துகள் நாட்டுடமையாக்கப்பட்டால் ஆதாரம் தருகிறோம்” என்றார் மழுப்பலாக.

`ஆதாரம் இருக்கு.. ஆனா இல்ல’ என்ற கதையாக தெரிகிறதே!