போதை மாத்திரை விற்ற வழக்கில் இளைஞர் கைது!

சங்ககிரியில் சிறுவா்களுக்கு போதை மாத்திரை விற்ற வழக்கில் தலைமறைவாக இருந்த இளைஞரை தனிப்படை போலீஸாா் சனிக்கிழமை கைது செய்தனா்.

சங்ககிரி போலீஸாா் சந்தைபேட்டை பகுதியில் ஜூன் 6 ஆம் தேதி ரோந்துப் பணியில் ஈடுபட்டிருந்த போது சிறுவா்களுக்கு சிலா் போதை மாத்திரை விற்பனை செய்வதாக பொதுமக்கள் தகவல் தெரிவித்தனா். இதுகுறித்து விசாரணை நடத்திய போலீஸாா் சந்தைப்பேட்டை, கோட்டைக்காடு பகுதியை சோ்ந்த சபரீசனை கைது செய்து அவரிடமிருந்து இருசக்கர வாகனம், நூறு போதை மாத்திரைகளை பறிமுதல் செய்தனா்.

இந்த வழக்கில் தலைமறைவான சங்ககிரி புதிய எடப்பாடி சாலை, வாணியா் காலனியைச் சோ்ந்த சிவா என்கிற சிவக்குமாரை (28) போலீஸாா் தேடி வந்தனா். இந்த நிலையில் சங்ககிரி காவல் ஆய்வாளா் ரமேஷ் தலைமையிலான தனிப்படை போலீஸாா் வாணியா் காலனி பகுதியில் இருந்த சிவக்குமாரை கைது செய்தனா்.