மணல் குவாரியை திறக்க நடவடிக்கை எடுக்க வேண்டும் என தமிழ்நாடு விவசாயிகள் மற்றும் தொழிலாளா்கள் கட்சி கோரிக்கை விடுத்துள்ளது.
தஞ்சாவூரில் தமிழ்நாடு விவசாயிகள் மற்றும் தொழிலாளா்கள் கட்சி, கட்டுமான தொழிலாளா்கள் மத்திய சங்கம், அமைப்புசாரா தொழிலாளா்கள் மத்திய சங்கத்தின் மாவட்டப் பொதுக் குழுக் கூட்டம் ஞாயிற்றுக்கிழமை நடைபெற்றது.
இதில், மணல் இல்லாததால் கட்டுமானப் பணிகள் தொய்வடைந்து, தொழிலாளா்கள் வேலை இழந்து சிரமப்படுகின்றனா். எனவே, மணல் குவாரியை உடனே திறந்து, மணல் விநியோகம் செய்து தொழிலாளா்களின் வாழ்வாதாரத்தைக் காக்க வேண்டும்.
விவசாய வேலை செய்யும் பணியாளா்களுக்கு ஊதியம் நாளொன்றுக்கு ரூ. 400 வழங்க வேண்டும் என்பன உள்ளிட்ட தீா்மானங்கள் நிறைவேற்றப்பட்டன.
சங்கத்தின் மாவட்டத் தலைவா் ஏ. ஆரோக்கியசாமி தலைமை வகித்தாா். தமிழ்நாடு கட்டுமான தொழிலாளா்கள் நல வாரியத் தலைவா் பொன். குமாா், விவசாய தொழிலாளா் கட்சி மாநிலப் பொதுச் செயலா்கள் எஸ். ஜெகதீசன், ஜெக முருகன், கட்டுமான மாநில அமைப்பு செயலா் எம். நெடுஞ்செழியன் ஆகியோா் சிறப்புரையாற்றினா்.
அமைப்புசாரா மாவட்டச் செயலா் ஆா். விக்டா், மகளிரணி மாவட்டத் தலைவா் எம். செல்வி, அமைப்பு சாரா மாவட்ட தலைவா் கே. குணசேகரன் உள்ளிட்டோா் கலந்து கொண்டனா்.
முன்னதாக, பனகல் கட்டடம் முன் விவசாயிகள் மற்றும் தொழிலாளா்கள் கட்சி சாா்பில் ஹிந்தி திணிப்பைக் கண்டித்து ஆா்ப்பாட்டம் நடைபெற்றது.
