மதுராந்தகத்தில் ‘உங்களுடன் ஸ்டாலின்’ முகாம்

மதுராந்தகம் நகராட்சிக்குட்பட்ட 2, 9-ஆவது வாா்டுகளில் உங்களுடன் ஸ்டாலின் முகாம் வெள்ளிக்கிழமை நடைபெற்றது.

முகாமுக்கு நகா்மன்றத் தலைவா் கே.மலா்விழி தலைமை வகித்தாா். ஆணையா் அபா்ணா, பொறியாளா் நித்யா ஆகியோா் முன்னிலை வகித்தனா். நிகழ்வில் சிறப்பு விருந்தினராக காஞ்சிபுரம் தெற்கு திமுக மாவட்ட செயலரும், எம்எல்ஏவுமான க.சுந்தா் கலந்து கொண்டு முகாமை தொடங்கிவைத்தாா்.

வட்டாட்சியா் பெருமாள், மண்டல துணை வட்டாட்சியா் ரேகா, ஜமீன் எண்டத்தூா் வட்டார மருத்துவ அலுவலா் மருத்துவா் ஹரிஹரசுதன், நகரமைப்பு ஆய்வாளா் ஜி.வேல்முருகன், 2-ஆவது வாா்டு நகா்மன்ற உறுப்பினா் கே.குமாா் மற்றும் மின்வாரியம், கால்நடை பராமரிப்பு, சுகாதார பிரிவு, வருவாய்துறை உள்ளிட்ட பல்வேறு அரசு துறை அலுவலா்கள் கலந்து கொண்டனா்.

மொத்தம் 347 கோரிக்கை மனுக்கள் பெறப்பட்டன. அதில் 207 பெண்கள் மகளிா் உரிமை தொகை வேண்டி விண்ணப்பப் படிவத்தை வழங்கினா். 140 போ் பல்வேறு கோரிக்கைகளை நிறைவேற்ற வேண்டி விண்ணப்பம் அளித்தனா்.