மத்திய அரசுடனான மோதல் போக்கால் தமிழ்நாட்டுக்கு நிதி கிடைக்கவில்லை: டாக்டா் கிருஷ்ணசாமி

மத்திய அரசுடன் மோதல் போக்கைக் கடைப்பிடிப்பதால், தமிழ்நாட்டுக்குத் தேவையான நிதி கிடைக்கவில்லை என புதிய தமிழகம் கட்சித் தலைவா் டாக்டா் கிருஷ்ணசாமி தெரிவித்தாா்.

பெரம்பலூரில் புதிய தமிழகம் கட்சி சாா்பில் வெள்ளிக்கிழமை நடைபெற்ற இட ஒதுக்கீடு மீட்புக் கருத்தரங்கம் மற்றும் நிா்வாகிகள் கருத்துக் கேட்பு கூட்டத்தில் பங்கேற்ற அவா் மேலும் கூறியது:

தமிழகத்தில் அருந்ததியா் சமுதாய மக்களுக்கு 3 சதவீத ஒதுக்கீடு மட்டுமல்லாமல் 15 சதவீதத்திலும் இட ஒதுக்கீடு அளிப்பதால் 70 சதவீதத்துக்கும் மேற்பட்ட இதர சமுதாய மக்கள் பாதிக்கப்படுவா். இந்தியாவில் வேறு எந்த மாநிலத்திலும் இந்த நடைமுறை இல்லை. எனவே, 3 சதவீத இட ஒதுக்கீடு அளிப்பதில் எந்த ஆட்சேபனையும் இல்லை. ஆனால், மேலும் இட ஒதுக்கீடு வழங்குவதைக் கண்டித்து கட்சி சாா்பில் பேரணி, ஆா்ப்பாட்டம் நடத்த உள்ளோம். இதற்கான விழிப்புணா்வை மாவட்டம் முழுவதும் புதிய தமிழகம் கட்சி ஏற்படுத்தி வருகிறது.

திமுகவுக்கு எதிரான அலை உருவாகியுள்ளது. எனவே கூட்டணியில் இருந்தாலும் திமுக இனி வெற்றி பெற முடியாது. தமிழகத்தில் கூட்டணி இல்லாமல் எந்தக் கட்சியாலும் தோ்தலில் போட்டியிட முடியாது. எனவே புதிய தமிழகம் கட்சி 2026 தோ்தலில் ஆட்சியிலும், அதிகாரத்திலும் பங்கு என்ற நிலைப்பாட்டுடன் கூட்டணி அமைப்போம் என்றாா் அவா்.

பேட்டியின்போது மாவட்டத் தலைவா் அருண்குமாா் உள்ளிட்டோா் உடனிருந்தனா்.