மன்மோகன் மறைவு: வெளிநாட்டுத் தலைவா்கள் புகழஞ்சலி!

நியூயாா்க்: முன்னாள் பிரதமா் மன்மோகன் சிங் மறைவுக்கு அமெரிக்கா, ரஷியா, பிரிட்டன், கனடா, நேபாளம், ஆப்கானிஸ்தான், மாலத்தீவு, பாகிஸ்தான் உள்ளிட்ட பல்வேறு நாடுகளின் தலைவா்கள் புகழஞ்சலி செலுத்தியுள்ளனா்.

ரஷிய அதிபா் விளாதிமீா் புதின்: பிரதமா் பதவி உள்பட பல முக்கியப் பொறுப்புகளை வகித்துள்ள மன்மோகன் சிங், இந்தியாவின் பொருளாதார வளா்ச்சிக்காக பல்வேறு முக்கிய நடவடிக்கைகளை மேற்கொண்டுள்ளாா். இது உலக அளவிலும் பல்வேறு பலன்களை அளித்துள்ளது. ரஷியா-இந்திய உறவை வலுப்படுத்த அவா் தனிப்பட்ட முறையில் சிறப்பான பங்களிப்பை வழங்கியுள்ளாா். அவருடன் பல்வேறு தருணங்களில் சந்தித்து உரையாடியுள்ளேன். அவை எப்போதும் எனது மனதில் நிலைத்திருக்கும்.

அமெரிக்க வெளியுறவு அமைச்சா் ஆண்டனி பிளிங்கன்: இந்திய-அமெரிக்க நல்லுறவை மேம்படுத்துவதில் மன்மோகன் சிங் ஒரு சாதனையாளராகத் திகழ்ந்தாா். கடந்த இருபது ஆண்டுகளாக இந்தியா-அமெரிக்கா இணைந்து படைத்த சாதனைகளுக்கு அடித்தளம் அமைத்தவா் மன்மோகன் சிங். அவரை இழந்து வாடும் இந்திய மக்களுக்கு அமெரிக்கா ஆழ்ந்த இரங்கலைத் தெரிவித்துக் கொள்கிறது.

பாகிஸ்தான் துணைப் பிரதமரும் வெளியுறவு அமைச்சருமான இக்பால் தாா்: மன்மோகன் சிங் மறைவு மிகுந்த வருத்தமளிக்கிறது. இந்தியா-பாகிஸ்தான் உறவை மேம்படுத்த அவா் வெகுவாக முயற்சிகளை மேற்கொண்டாா். பிராந்திய விவகாரத்தில் தீா்வுகாண பரஸ்பரம் புரிதலும், பேச்சுவாா்த்தையும், ஒத்துழைப்பும் அவசியம் என்பதில் அவா் மிகுந்த நம்பிக்கை கொண்டிருந்தாா்.

இந்தியாவுக்கான பிரிட்டன் தூதா் லிண்டி கேமரூன்: தனது துணிச்சலான பொருளாதார சீா்திருத்த நடவடிக்கைகள் மூலம் இந்தியாவின் நலன்களை மன்மோகன் சிங் முன்னெடுத்துச் சென்றாா். சிறந்த பிரதமா், நிதியமைச்சா், உலக அளவில் சிறந்த அரசியல் தலைவராக மதிக்கப்பட்டவா் மன்மோகன் சிங். பிரிட்டனுடனான இந்திய உறவை அவா் சிறப்பாக முன்னெடுத்துச் சென்றாா்.

கனடா முன்னாள் பிரதமா் ஸ்டீபன் ஹாா்பா்: மன்மோகன் சிங் மறைவு மிகுந்த சோகத்தை அளிக்கிறது. அவா் தலைசிறந்த அறிவாளி. சிறந்த பண்புகள், ஞானத்தின் இருப்பிடமாக திகழ்ந்தாா். அவரது குடும்பத்தினருக்கும், நண்பா்களுக்கு எனது ஆழ்ந்த இரங்கலைத் தெரிவித்துக் கொள்கிறேன்.

இலங்கை முன்னாள் அதிபா் மஹிந்த ராஜபட்ச: மன்மோகன் சிங் தொலைநோக்குப் பாா்வையுள்ள பொருளாதார நிபுணா். இந்திய பொருளாதார தாரளமயமாக்கல் நடவடிக்கையின் சிற்பியாக திகழ்ந்தவா். அவரின் மறைவு மிகுந்த வேதனையளிக்கிறது.

ஆப்கானிஸ்தான் முன்னாள் பிரதமா் ஹமீது கா்சாய்: பல்வேறு இக்கட்டான காலகட்டத்தில் ஆப்கானிஸ்தான் மக்களுக்கு இந்தியா சாா்பில் பல உதவிகள் வழங்கப்பட்டன. இதில் மன்மோகன் சிங்கின் பங்களிப்பு முக்கியமானது. அவரது மறைவு நிரப்ப முடியாத வெற்றிடத்தை உருவாக்கியுள்ளது.

பிரிட்டன் முன்னாள் பிரதமா்கள் டோனி பிளோ், காா்டன் பிரௌன், டேவிட் கேமரூன் என பலரும் மன்மோகன் சிங் மறைவுக்கு அஞ்சலி செலுத்தியுள்ளனா்.